КУЧЕМЫШТЕ

Полыш кумдаҥеш

Марий Элыште кужу жап ончымо системе кышкарыште 200 илалше еҥ ден инвалидлан квалифицироватлыме полышым чылт яра пуат.

Марий Эл правительствын заседанийыштыже калык илышым саемдыме шотышто министр Марина Островскаян увертарымыж почеш, республикна Россий Федерацийын «Демографий» национальный проект кышкарыште илалше еҥ ден инвалид-влакым кужу жап ончымо системым ыштыше 34 регионжо-влак коклаш логалын.

Тачеш системе дене Йошкар-Олаште, Волжскышто, Звенигово, Оршанке да Юрино районлаште пайдаланаш лиеш. Тиде пашалан тений 55 миллион утла теҥгем ойырымо.

Республикым вуйлатышын обязанностьшым жаплан шуктышо Юрий Зайцев системын шуко еҥлан полшымыжым палемден, вет илалше еҥ ден инвалид-шамычым ончаш йöршынат куштылго паша огыл.

«Обслуживатлыме пашашке тымарте 198 еҥым налынна. Пилотный проектым кумдаҥдат манын ÿшанена. Российын Минтрудшо илалше еҥ ден инвалид-влакым кужу жап ончышо пашаеҥ-шамычын республик мучко мыняр кÿлмыштым шотлен лукташ кÿштен. Тиде системе ончыкыжым чыла муниципалитетым авалта манын ÿшанена», – палдарен М.Островская.

Министр неле илыш йыжыҥыш логалше еш-влаклан йол ÿмбак шогалаш полшышо социальный контрактын кÿлешлыкше да пайдалыкше нергенат ушештарен. 2021 ийыште регионыштына 2720 еҥ тыгай ойпидышым ыштен.

Ю.Зайцев республикыштына социальный контрактын практикыжым кумдаҥдаш кÿштен да тиде ойпидышыш пуртымо вашталтыш-влак, тыгай тÿҥалтышыш калыкым ушен толмо шырым дене эреак палдарен шогаш йодын.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

 

Опубликовать в Одноклассники

Добавить комментарий