22 декабрьыште Марий Эл Республикын шымше гана чумырымо Кугыжаныш Погынжын кумло нылымше сессийже эртен. Депутат-влак 30 йодышым онченыт.
Заседанийын тӱҥ йодышыжо – «Марий Эл Республикын Конституцийышкыже Марий Эл Республикыште публичный кучемын организацийжым саемдыме йодыш шотышто тӧрлымаш нерген» законын проектшым пытартыш гана лудмаш. Икымше лудмашыште тудым 17 майыште ончымо.
Документын у редакцийже дене келшышын, Марий Эл Кугыжаныш Погынын чыла депутатшылан Россий Федераций деч ӧрдыжтӧ верланыше йот элласе банклаште счётым (вкладым) почаш да кучаш, наличный окса ден шергакан арверым аралаш чаралтеш. Тыгак Марий Эл Республикым вуйлатыше палемдыме должностьышто кок срок деч шуко жап пашам ыштен кертеш.
Сессийыште депутат-влак Марий Элым вуйлатыше Юрий Зайцевын республикын правительстве председательжын алмаштышыже-влакын должностьышкышт темлыме Ольга Бадма-Халгаева ден Евгений Курмаевын кандидатурыштым пеҥгыдемденыт, финанс министрын должностьышкыжо – Алексей Торощиным, промышленность, экономически вияҥмаш да торговльо министрын долностьышкыжо – Станислав Крыловым, образований да науко министрын должностьышкыжо – Лариса Ревуцкаям, тазалык аралтыш министрын должностьышкыжо – Марина Паньковам.
Кугыжаныш Погын «Марий Эл Республикыште сарын йочаже-влак нерген» у законым приниматлен. Тудын дене келшышын, «сарын йочаже-влак» статусым 1927 ий 1 январь гыч 1945 ий 31 декабрь марте СССР-ын кумдыкыштыжо шочшо да эреак Марий Элыште илыше Россий Федерацийын гражданже-шамыч налын кертыт. Пенсий фондын увертарымыж почеш, республикыштына 24 тӱжем утла еҥ «сарын йочаже» лийын кертеш.
Ончыкыжым нине еҥ-влаклан ий еда Сеҥымаш кече вашеш окса выплатым (кугытшо Марий Элым вуйлатышын указше дене пеҥгыдемдалтеш) ыштат, кугыжаныш ден муниципальный медорганизацийлаште медицине полышым яра да черет деч посна пуат, социальный обслуживанийын организацийлашкыже эн ончыч налыт, социальный полышым мӧҥгыштӧ пуымо пӧлка-влакат черет деч посна обслуживатлат.
Эше ик у закон ялозанлыкым вияҥдымашке виктаралтын. Тушто регионысо аграрный политикын тӱҥ цельже, принципше да направленийже-влакым, АПК ден ял кумдыкым вияҥдыме аланыште кучем орган-шамычын полномочийыштым палемдыме, тыгак ялозанлыкым вияҥдыме аланыште ойыралтше кугыжаныш полышым радамлыме.
Южо граждан-влаклан полшымо мере-шамычымат пеҥгыдемдыме. Мутлан, специальный военный операцийыште мобилизаций але ойпидыш дене участвоватлыше да Россий Вооруженный Вий ончылан шындыме задачым шуктышо граждан-влакым 2021 да 2022 ийласе налог пагытлан транспорт налог деч утарыме.
Парламентарий-шамыч тыгак республик кӱкшытан икмыняр законым федеральный дене келыштареныт.
Тиде кечын сессийыште Марий Эл Республикын 17 законжым да Кугыжаныш Погынын 33 пунчалжым приниматлыме.
М.ИВАНОВА
