11 ноябрьыште Марий Эл правительстве председательын алмаштышыже Александр Сальников верысе самоуправлений органлаште сай паша лектышыш шумылан район вуйлатыше-влакым да республикыште кумдык-влакым тӱзатыме шотышто всероссийский йӱклымаш йодышым СМИ-лаште тӱрыс почын пуышо журналист-влакым наградитлен.
Верысе самоуправленийын пашажлан акым пуымаш 2009 ий гыч, РФ президентын указше дене келшышын, эртаралтеш. Сеҥыше-влаклан грант кугытым палемдыме годым вич сферыште 10 показатель шотыш налалтеш: тиде – экономике вияҥмаш, школ деч ончычсо образований, илыме верым чоҥымаш да нуным граждан-влаклан ойырымаш, илыме вер да коммунал озанлык, мунициапальный вуйлатымаш.
Правительственный комиссийын ончен лекмекыж почеш, 2019-2021 ийлаште сай показательыш шумышт дене Марий Элыште оласе да муниципальный район-влак кокла гыч тений чылаже шым администраций ойыртемалтын. 1-ше верыш Козьмодемьянск ола, 2-шо верыш Звенигово район да 3-шо верыш Медведево район администраций-влак лектыныт.
2021 ийым иктешлымек, Параньга, Марий Турек, Курыкмарий район-влакын да Волжск олан администрацийышт диплом дене палемдалтыныт.
Тиде кечынак Марий Элысе кумдыкым тӱзатышаш верч всероссийский йӱклымашлан кӱлеш кӱкшытыштӧ ямдылалтмылан, профессионализмым ончыктымылан да сайын эртарен колтымылан, тыгак «Оласе йырвелым йӧнаным ыштымаш» федеральный проектын «Илыме вер да оласе среда» нацпроектым илышыш сайын шыҥдарымылан «Национальные приоритеты» автономный коммерческий огыл организаций деч таумутым кучыктеныт.
«Марий Элыште сай лектыш уло. Ончылгоч шотлен лукмына почеш, всероссийский йӱклымашке 38 тӱжем наре еҥ ушна манын ӱшаненна, а чынжым гын, шукырак, 40 тӱжем утла, еҥ ушнен. Йӱклымаш дене келшышын, кум олаште – Йошкар-Олаште, Волжскышто да Козьмодемьянскыште – илыше-влак тӱшка калык пайдаланыме могай кумдыкым эн ондак тӱзаташ кӱлмым шотыш налын йӱкленыт. Тиде паша сайын кайыже манын, калык дек уверым жапыштыже намиен шукташ кӱлын, кумда информационный кампаний эртаралтын: телевиденийыште сюжет-влак ончыкталтыныт, соцсетьлаште увер-влак вераҥдалтыныт, печать СМИ-лаште публикаций-влак савыкталтыныт. Еҥ-влак 530 тӱжем гана уверым налыныт, да лукмо пунчал-влакым калык сайлан шотлен», – каласен Александр Сальников.
«Национальные приоритеты» АНО-н таумутшо дене Тӱвыра, печать да калык-влакын пашашт шотышто министерствын печать да массовый коммуникций отделжын вӱдышӧ специалист-экспертше Иван Земцов, ««Ведомости Козьмы и Дамиана» газетын тӱҥ редакторжо Татьяна Горбачевская, «Волжская ПРАВДА» газетын тӱҥ редакторжо Александр Лукаев, «Телеком ТВ» ООО-н директоржо Анна Ларюхина, «Марийская правда» газетын корреспондентше Анна Степанова, тыгак Йошкар-Ола администрацийын пресс-службыжын пашаеҥже-влак Юлия Одёрышева ден Каролина Незамаева, Козьмодемьянск олан мэржын алмаштышыже Елена Ступина, Волжск ола администрацийын пашаеҥже-влак Надежда Родионова, Елена Бакуркина, Ксения Торощина палемдалтыныт.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
