7-9 июльышто Москваште III Всероссийский сӱан фестиваль лиеш. Марий Эл гыч тушко Медведево посёлко гыч самырык мужыр – Дмитрий Казанцев ден Марина Семенова – кая.
Каче ден ӱдырын еш историйышт Шернур районышто тӱҥалын. Дмитрий Поланур ялыште шочын-кушкын, Марина – Шернур посёлкышто. Коктынат марий еш гыч улыт, изинек шочмо калыкын йӱлажым пален да шуктен, пашалан шӱмаҥын кушкыныт. Ийготым погымеке, пӱрымаш нуным ваш ыштен, йӧратымаш кумыл авалтен, санденак ешым чумыраш кумылаҥыныт. Латик тылзе ончыч ӱдыр азашт шочын.
Кызыт еш Медведево посёлкышто ила. Самырык ача кӱртньӧ омсам ыштен лукшо ик фирмыште тырша, Марина – «Сайвер» Шолеҥгер химзавод» акционер обществыште. Коктынат сай специалист улыт да кундемнам вияҥдаш полшышо организацийыште ыштымышт дене кугешнат.
Эртыше кечылаште мужыр дене Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов вашлийын. Вате-марий сӱан фестивальын ойырен налме конкурсыш ушнымышт да сеҥыме нерген пален налмеке, могай куаным шижмышт нерген ойленыт. Мутышт почеш, Дмитрий ден Марина фестивальыште Марий Элын чапшым лийжак манын аралаш ямдылалтыт, могай тыште икте-весым пагалыше да йӧратыше еш-влак илыме нерген палдарынешт.
Еш, йӧратымаш да ӱшанле улмо кечылан пӧлеклалтше сӱан фестиваль Москосо «Россий» национальный рӱдерыште эрташ тӱҥалеш. Тушко пӱтынь элнан регионлаж гыч пиалан мужыр-влак мият. Организатор-влак нунымеш-влакым ойырымышт годым мер илышыште чолга улмыштым, икшывым кузе ончен-куштымыштым, социально кӱлешан профессий дене пашам ыштымыштым, пӧръеҥын армийыште служитлымыжым шотыш налыныт. Марий Элын чапшым моткоч сай мужыр аралаш тӱҥалеш.
Светлана Носова
Снимкыште: Дмитрий Казанцев ден Марина Семёнова Константин Иванов дене пырля.
Фотом Марий Элын Тӱвыра, савыктыш да калык-влакын пашашт шотышто министерствын воткыл лаштыкше гыч налме.
