Волжскышто шуко пачеран у пöртым чоҥат, тушко 200 наре еҥым кусараш палемдат.
Марий Элыште «Илыме вер да оласе йырвел» национальный проектын «Илаш йöрдымö илыме фондым иземдымаш» федеральный проектшым илышыш пуртымо кышкарыште 2017 ий 1 январь марте аварий лийын кертме лÿдыкшанлан шотлымо пöртла гыч калыкым вес верыш кусарыме паша умбакыже шуйна.
Марий Элын Чоҥымо паша, архитектур да илыме-коммунал озанлык министерствыжын ЖКХ-ам реформироватлаш полшымо фондлан увертарымыж почеш, Волжск оласе Прохоров уремыште у пöрт чоҥалтеш, тушто 67 пачерым аварий лийын кертме лÿдыкшан пöртлаште илыше-влаклан налме, 24 пачерым тулык йоча-шамычлан пуаш палемдыме.
Индеш пачашан кок подъездан у пöртым 2022 ий октябрьыште чоҥен шуктышаш улыт. Тушко Волжск олан тÿрлö микрорайоныштыжо: Гагарин, Чапаев, Зелёный, Комаров, Щорс да моло уремлаштыже, верланыше аварий лийын кертме лÿдыкшан 29 пöрт гыч 200 наре еҥ илаш кусна.
«Кумдык-влакым вияҥдыме фонд» публично-правовой компанийын генеральный директоржо Константин Цицинын (снимкыште) палемдымыж почеш, Россий Федерацийын субъектлаштыже аварийный илыме фондла гыч калыкым вес верыш кусарыме паша умбакыже шукталтеш. Илышыш пурташ палемдыме программе социально кÿлешан шуко задачым решатлымашке виктаралтын. Тудо шÿкшемше пöртлаште илыше калыклан у да чапле пачерлашке илаш куснаш, чоҥымо отрасльлан полшаш йöным ышта. Программыште палемдыме мероприятий-шамычым ончылгоч шуктымо дене 2017 ий 1 январь деч вара аварийныйлан шотлымо пöртлаште илыше-влакымат келшыше верыш кусараш тÿҥалаш лиеш.
Волжскышто кызыт нöлтымö пöрт воктене эртыше ийын чоҥымо шуко пачеран пöрт шинча. Тушко аварийный илыме фондла гычат илаш кусненыт. Мутлан, 2021 ий декабрьыште пöртсийым палемдыше Любовь Исаева ойырымо пачер нерген сайым гына ойла:
– Аварийныйлан шотлымо пöртлаште илыше палымем-шамыч унала толыт да ончыкылык пöртыштын кузе чоҥалтмыжым эскерат. Тиде, конешне, илышын йöршын вес кÿкшытшö! Ме пеш пиалан улына – шонымашна шукталтын.
Ушештарена, Марий Эл ден ЖКХ фонд коклаште ешартыш соглашенийым ыштыме. Тудын дене келшышын, регион 2017 ий 1 январь йотке аварийныйлан шотлымо илыме фонд гыч граждан-влакым у пöртыш кусарыме пашам 2023 ий мучаш марте шукташ обязательствым налын.
– Шкат ужына, Россий правительствын чоҥымо отрасльлан полшымашке виктаралтше кумда системыже сайын пашам ышта. Кызытсе простажак огыл жапыштат регион-влак программым илышыш икшырымын пуртат. Конешне, ты направлений дене эше шагал огыл кугу пашам шукташ кÿлеш. Но социальный программын участникше-влак ончылно чыла обязательствым – улшыжымат, ужымат – регионлаште шукташ тÿҥалыт, – палемден Россий Федерацийын чоҥымо паша да илыме-коммунал озанлык министржын алмаштышыже Алексей Ересько.
М.ИВАНОВА
Фотом интернет гыч налме
