Марий эстраде мурызо, уста гармоньчо Артур Ефремовын шӱмжӧ 5 майыште кырымым чарнен.
Артур моткочак талантан, сылне йӱкан ыле. Ыле манаш йылме йӧршын огеш савырне… Кумда сценыш лекмыжлан ӱмаште лу ий лийын. Тиде жапыште тудо ятыр мурылан мутым, семым возен, тӱрлӧ фестивальыште, конкурсышто мастарлыкым ончыктен. Гастроль дене республикыште илыше-влакым веле огыл куандарен, йолатышыже-влак дене марий-влакын тӱшкан илыме кундемлашкат чӱчкыдынак лектын коштын. Сылне йӱкан гармоньжо дене шокталтен-муралтымыжым, шыргыжалын ончалмыжым чыланат йӧратен онченыт. Теве, мутлан, пытартыш кок ий почела сольный концертшымак налаш. Кок ганажат калык зал тич погынен. Кодшо ийын концертшым «Ончал тый мыйын шинчашкем» манын лӱмден ыле. «Ты кастене пайрем касыш толшо кажне еҥын шинчашкыже мыят ончалнем», — ойлен концерт деч ончыч интервьюштыжо.
Концертше дене чынжымак ӧрыктарен: сценыште Артур гармоньым, гитарым да эше шӱвырым шоктен. Тиддеч посна ӱжмӧ унаже-влак кӱсле, скрипка сем дене ончаш толшо-влакым куандареныт. «Кажне концертым экзаменлан шотлем», — манын тудо.
Пелашыж дене коктын кок ӱдырым ончен куштеныт. Мурызо кумылан ача Карина ден Лизамат сценыш луктын, нуныланат мурым ямдылен.
Артур поэзий шӱлышан лийын. Репертуарысе коло утла мурыж гыч иктаж пелыже утлалан, очыни, мутшо ден семжым шкежак возен. Тудын йоҥгалтарыме мурыжо-влак поро шӱлышан, вийым ешарыше, тавалташ таратыше, «шулдыраҥдыше» лийыныт да лийыт.
Артур, аварийыш логалмеке, ятыр жап эмлымверыште лийын. Тидланат йолташыже, палымыже да тудын мурыжым йӧратышыже-влак ойгыренна да паремеш, уэш йол ӱмбаке шогалын, сылне мурыжо-влак дене калыкым куандараш тӱҥалеш манын ӱшаненна. Но…
Артур, тый эреак пеленна кодат да мурет-влак эреак йоҥгаш тӱҥалыт.
А.Ефремовын уке лиймыжлан меат чот ойганена да ешыжлан, ача-аважлан, йолташыже, родо-тукымжо ден палымыже-влаклан чаманымашым ойлена.
Кийыме верет пушкыдо лийже, Артур!
«Марий Эл» газетыште Артур дене савыкталтше пытартыш интервьюм 2019 ий тӱҥалтыште лудаш лиеш.
«Марий Эл» газетын икоян коллективше
