Мланде паша илышнам уланым ышта
Йошкар-Олаште Россий кӱкшытан тенийысе Пеледыш пайремым 20 наре усталык коллектив сӧрастарен.
Элнан 10 регионжо да республикысе районла гыч нуно лийыныт. Кугарнян кастене тора гыч толшо марий-влак марий рӱдолан Патриарший площадьыштыже «Йыр куштымаш» фестивальыш ушненыт. Тушто нунын дене пырля толшо усталык коллектив-влакын мастарлыкыштым ужын кертме. Кодшо ийын эсогыл 18 регион гыч лийыныт гын, тений лу гыч: Пошкырт, Татарстан, Коми, Чуваший, Удмуртий республикла, Киров, Свердловск, Ленинград областьла, Хант-Манси автоном округ, Моско ола гыч. Ӧрдыж марий-влак Мер Каҥашын пайремыш толаш ӱжмашыжым кумылын вашлийыт. Тений Тюмень ола, Финляндий гыч толшо посна еҥ-влакат лийыныт. Кугу делегацийлам ужатен коштшо волонтёр-шамычым Мер Каҥашак ончылгоч палемда. Теният тыгак лийын.
Пайрем кечын эн ончыч чылан В.И.Ленин лӱмеш тӱвыра полат ончылно чумыргеныт. Тушто марий йӱла почеш кинде-шинчал дене вашлийыныт. Йошкар-Олаште улшо землячестве-шамычат таҥошкылмашке ушненыт. Вара икте почеш весе шогалын, оланан тӱҥ проспектше дене тӱшкан М.Шкетан лӱмеш кугыжаныш национальный драме театр марте, мурен-куштен, икте-весе дене вашлиймылан куанен ошкылыныт.
Тӱҥ площадьыште погынышо калыкым пайрем дене Марий Эл вуйлатыше Юрий Зайцев, Кугыжаныш Погын председатель Анатолий Смирнов, Россий Кугыжаныш Думын депутатше Сергей Казанков, марий калыкын тӱҥ онаеҥже Александр Таныгин, Оньыжа Эдуард Александров саламленыт.
«Пеледыш пайрем пасу пашаште тыршыше, марий тӱвырам пагалыше тыглай еҥ-влаклан эре калык пайрем семын кодеш. Тений тудо Россий президентын увертарыме Еш идалыкыштылан пӧлеклалтеш. Ваш келшен илыше марий ешна шке йӱлаж дене ойыртемалтеш. Лач ешыште айдемын чон кӧргӧ поянлыкшылан негыз – порылык, чыным йӧратымаш, шке койыш-шоктышлан мутым кучымаш, шочмо элым, пашам йӧратымаш, кугурак-влакым пагалымаш – пышталтеш, – каласен Юрий Зайцев.
Тудо чыланыштлан пеҥгыде тазалыкым, пиалым, улан илышым да ончыкыжымат сеҥымашке шуаш тыланен.
Пеледыш пайрем – шошо ага пашам иктешлыме пайрем. Республикысе экономикын вияҥме негызшылан лачшымак ялозанлык шолалтеш. Саламлымеке, регион вуйлатыше ойыртемалтше-влаклан кугыжаныш наградым кучыктен. «РФ ялозанлыкын сулло пашаеҥже» чап лӱм дене «Шойбулакский» племзаводын тракторист-машинистше Леонид Соколов палемдалтын. Марий Эл Правительствын Чап грамотшым У Торъял районысо «Первый май» ялозанлык артельын тӱҥ агрономжо Анатолий Курбатов, Марий Эл Республик вуйлатышын Тауштымашыжым Параньга районысо «Победа» производственный кооперативын трактористше Сергей Тасаев суленыт.
Тенийысе ага пашаште сай лектыш дене ойыртемалтше-влакым варажым ялозанлык да продовольствий министр Андрей Кондаратенко палемден. «Эн сай районлан» Медведево районым шотлымо. 5 тӱжем гектар деч утларак кумдыкышто икияшым ӱдышӧ ялозанлык предприятий-влак тӱшкаште кумшо верыш Марий Турек район гыч «Акпарс» агрофирме, кокымшыш У Торъял район «Первый май» колхоз, икымшыш Медведево район «Шойбулакский» племзавод лектыныт.
Икияшым 1 тӱжем гыч 5 тӱжем гектар марте кумдыкышто ӱдышӧ-влак тӱшкаште Оршанке район «Родина» колхоз (3-шо вер), Марий Турек район «Ладога» (2-шо вер), Марий Турек район «Марий Купто» (1-ше вер) ООО-влак лийыныт.
1 тӱжем гектар марте кумдыкышто икияшым ӱдышӧ-влак коклаште кумшо вер дене Медведево район «Пригородный» ООО, кокымшо вер дене Волжский район гыч Р.Хайрулинын вуйлатыме фермер озанлыкше да икымше вер дене Советский район «Родина» колхоз палемдалтыныт.
Эн сай механизатор-влакынат лӱмышт рашемын:
Икымше верыш Курыкмарий район «Бабушкин» ООО гыч Ю.Айватров, кокымшыш Марий Турек район «Акпарс» агрофирме гыч Н.Макаров да кумшыш Кужэҥер район «Искра» колхоз гыч И.Файзрахманов лектыныт.
Пеледыш пайремым торжественно почмо мероприятийым пеш мотор концерт шуен. Тушто Москосо ВДНХ-ште эртыше «Россий» тӱнямбал ончерыште Марий Элын ойыртемалтше тӱвыраж дене палдарыше усталык коллектив, артист-влак выступатленыт. Нунын коклаште «Марий Эл» кугыжаныш куштышо ансамбльын марий калык, йӱлаж дене палдарыше куштымаш поснак келшен. Тушто чылажат уло: мо дене марий еҥ илен да кызыт ила. Моткоч виян куштымаш.
Светлана Носова
М.Скобелевын фотожо.
