ОБРАЗОВАНИЙ ПРАВОСЛАВИЙ УВЕР ЙОГЫН

«МЕМНАН ДЕНЕ ОНЧЫКЫЛЫК КЫЛДАЛТЫН»

Волжский районысо Шарача школышто Педагог ден наставникын идалыкыштлан да Йошкар-Ола епархийым ыштымылан 30 ий теммылан пӧлеклалтше «Жап кыл – тукым кыл» («Связь времён – связь поколений») VII науко-практике конференций эртаралтын.

Мероприятийым Шарача школ, Волжский район администрацийын образований пӧлкаже, Марий митрополийын Волжский епархийже организоватленыт. Конференцийыште районысо школла гыч 100 утла тунемше участвоватлен, тыгак Морко район гыч педагог-влак да Волжский епархийын духовенствыже лийыныт.

Пагалыме уна-влакын выступленийышт, школышто вераҥдыме баннер, мероприятийыште ончыктымо видеоролик-шамыч кок тӱҥ темылан – Россий кӱкшытыштӧ увертарыме Педагог ден наставникын идалыкыштлан да Йошкар-Ола епархийым ыштымылан 30 ий теммылан – пӧлеклалтыныт. Фотостенд, теме дене кылдалтше ӱстел ден ончер-влак Шарача школышто шинчымашым пуымо системын тӱҥ корныжо-шамыч ден паша лектышыж нерген каласкаленыт.

Конференцийым актовый залыште торжественно почыныт. Уна ден участник-шамычлан саламмутым Волжский район администрацийын образований пӧлкажым вуйлатышын алмаштышыже Галина Матвеева ойлен:

– Элнан президентше Владимир Владимирович Путин Федеральный Погынымашлан посланийыштыже калыкыште туныктымо пашам чапландараш, ача-ава-шамычлан икшывыштлан педагоглан тауштымо нерген чӱчкыдынрак ушештараш, а педагог-влаклан ача-авам пагалаш да йӧраташ туныкташ кӱлмӧ нерген ойлен. Ме умылена, элнан ончыкылыкшо лачшымак педагог-шамыч дене кылдалтын. Да мый коллегына-шамычым саламлем, порыслан ӱшанле улмыштлан, профессийым палымыштлан да кажне кечын чоным пыштен тыршымыштлан тауштем.

Галина Викторовна школышто тунемше ӱдыр-рвезе-влакын шымлыме пашаштын кӱлешлыкшымат палемден.

Айдемым вияҥдымаште педагогын рольжо нерген Волжский епархийын образований да катехизаций епархиальный пӧлкажым вуйлатыше протоиерей Александр Михайлов ойлен.

Конференцийым официально почмо нерген Шарача школын директоржо Ольга Гаврилова увертарен:

– Элыштына, районыштына, селаштына кушкын толшо тукымым патриотизм шӱлышеш воспитатлыме паша кугыжаныш структур, тунемме заведений, тӱвыра да ешартыш шинчымаш тӧнеж-влакын ик эн тӱҥ задачыштлан шотлалтеш. Йоча пагыт ден самырык жап шочмо элым, тукымым йӧраташ да пагалаш туныктымо эн сай йыжыҥ-влак улыт. Конференцийнам арам огыл «Жап кыл – тукым кыл» манын лӱмденна. Российын историйыштыже калыкын патриотический да национальный идей-влак йыр погынымыжо, тушманым сеҥымыж дене кылдалтше пример шагал огыл. Залыштына самырык уш-влакым – кугурак класслаште тунемше ӱдыр-рвезе-шамычым – ужаш моткоч куанле, вет лачшымак усталык дене кылдалтше тӱҥалтыш, шымлыме паша кугыжаныш кучемым, православный верам да обществым ончыкыжымат арален кодаш полшат.

«Священник Гавриил Яковлевын сотемдарыме да пастырь пашаже – черкылан служитлыме пример: эртыше жап да кызытсе пагыт» пленар докладым Марий митрополий пеленысе кусарыше комиссийым вуйлатыше, марий йылме дене савыкталтше «Шӱм-чон изолык» православный журналын тӱҥ редакторжо, Морко районысо Арын селаште верланыше Христос Шочмо лӱмеш черкын настоятельже протоиерей Николай Чузаев ыштен. Тудо Гавриил Яковлевын илышыже да пашаже, Юмылан служитлымыже, йоча-влак дене пеҥгыде кылым ыштымыж нерген радамын каласкален.

«Жап кыл – тукым кыл» доклад дене Шарача школын 10-шо классыштыже тунемше Ангелина Ашкельдина выступатлен.

Конференцийыште ныл секций пашам ыштен. «Тукым-влакын диалогышт» йыргешке ӱстел йыр мутланымаш» лӱман икымше секцийым Шарача школышто историй ден обществознанийым туныктышо Роза Васильева ден протоиерей Александр Михайлов вуйлатеныт. «Туныктышо – наставник лияш ӱжшӧ профессий» теме дене докладым Памар школын 8-ше классыштыже тунемше-влак Иван Козлов ден Алина Павлова (вуйлатышышт Е.Самойлова, директорын воспитатлыме паша шотышто алмаштышыже) ыштеныт, «Протоиерей Иоанн Соколов – писатель Д.Н.Мамин-Сибирякын туныктышыжо да наставникше» теме дене докладым – Шарача школын 8-ше классыштыже тунемше Ирина Иванова (вуйлатышыже Маргарита Михайлова, историй ден обществознанийым туныктышо), «Туныктышо-влакын династийышт» теме дене докладым – Приволжский школын 9-ше классыштыже тунемше Софья Данилова (вуйлатышыже Любовь Бахтина, англичан йылмым туныктышо), «Туныктышо-земляк-влак» теме дене докладым – Кугу Корамас школын 9-ше классыштыже тунемше-шамыч Дарья Семёнова ден Ольга Кузнецова (вуйлатышышт Надежда Кузнецова, руш йылме ден литературым туныктышо).

«Российын патриотшо-влак. Тукым-шамычын диалогышт» кокымшо секцийым Марий Элысе Общероссийский калык фронтын экспертше, Марий митрополий пеленысе кусарыше комиссийын пашаеҥже, «Шӱм-чон изолык» журналын шеф-редакторжо, Шарача школышто информатикым туныктышо Денис Смирнов ден протоиерей Николай Чузаев вуйлатеныт. Доклад-шамычым «Российын патриотшо-влак» теме дене Сотнур школын 10-шо классыштыже тунемше Дарина Оразаева (вуйлатышыже Валентина Иванова, директорын воспиталыме паша шотышто алмаштышыже), «Илышын ыҥжым кычалме йодыш да айдемын пӱрымашыже» теме дене Шарача школын 10-шо классыштыже тунемше Ольга Рязанцева (вуйлатышыже Людмила Томцева, руш йылме ден литературым туныктышо), «Мемнан дене ончыкылык кылдалтын» теме дене Карай школын 11-ше классыштыже тунемше Павел Цандеков (вуйлатышыже Алевтина Гордеева, историй ден обществознанийым туныктышо), «Педагог-фронтовик» теме дене Шарача школын 10-шо классыштыже тунемше Алексей Томцев (вуйлатышыже Людмила Томцева, директорын воспитатлыме паша шотышто алмаштышыже) да «Тукым-влакын кылышт. Наставничестве да патриотизм» теме дене Шарача школын 8-ше классыштыже тунемше Никита Мачайкин (вуйлатышыже Татьяна Николаева, шочмо йылме ден литературым туныктышо) ыштеныт.

«Кидлан паша – шӱмлан куан» кумшо секцийым Шарача школышто музыкым туныктышо Надежда Тимофеева ден 9-ше классыште тунемше, «Благодарим» волонтёр отрядым вуйлатыше Анна Акмазова виктареныт.

«Кушкын толшо тукымым чонгӧргӧ арулыкышто воспитатлыме пашаште педагогын верже» туныктышо-влакын йыргешке ӱстел йыр мутланымашышт» нылымше секцийым Шарача школ директорын науко да методике паша шотышто алмаштышыже Валентина Гордеева ден Сотнур селасе Святой Троице лӱмеш черкын настоятельже, иерей Игорь Сапаев вуйлатеныт. Доклад-влакым Шарача школын педагогшо-шамыч ыштеныт: «Ме россиянин улына» теме дене – дошкольный группо воспитатель Елена Чамаева, «Тӱҥалтыш школ ийготан тунемше-влакын чонгӧргӧ арулыкыштым проект да шымлыме паша гоч вияҥдымаш» теме дене – тӱҥалтыш класслаште туныктышо Людмила Кудрявцева, «Тунемше-влакым математике урокышто чонгӧргӧ арулыклан воспитатлымаш» теме дене – математикым туныктышо Алевтина Кузьмина, «Тунемше-шамычым литератур урокышто чонгӧргӧ арулыклан воспитатлыме педагогике йӧн-влак» теме дене – руш йылме ден литературым туныктышо Людмила Томцева.

Конференцийыште выступатлыше кажне докладчик шкенжым ӱшанлын кучен, темым сайын пален, модератор-влакын да аудиторийын йодышыштлан кокытеланыде вашештен. Мероприятийым иктешлыме годым организатор-влак кугурак класслаште тунемше-шамычын шымлышаш пашалан тӱрлӧ темым ойырен налмышт да нуным радамын лончылымышт нерген ӧрын-куанен ойленыт. Тыштыже йоча-влакынат, туныктышо-наставник-шамычынат надырыштым палемденыт.

Кугурак класслаште тунемше ӱдыр-рвезе-влакын мутышт почеш, шымлымаш паша-шамыч кажным у шинчымаш дене пойдареныт, мом палымым кучылташ, палыдымым рашемдаш, тыгак шкем шуко шотышто вияҥдаш, калык ончылно аптыраныде выступатлаш, деловой качествым нӧлташ йӧным ыштеныт.

А Шарача школын администрацийже кугун орланыше Димитрий Солунский лӱмеш черкын настоятельже Евгений Бакутовлан мероприятийым эртараш финанс велым полшымыжлан уло шӱм-чон дене таушта.

Денис СМИРНОВ

М.ИВАНОВА ямдылен

Д.СМИРНОВЫН фотожо

Опубликовать в Одноклассники

Добавить комментарий