«Репродуктивный потенциал России» XVII общероссийский форумын экспертше-влакын зависитлалтдыме акышт почеш, 2023 ийыште Марий Элын Перинатальный рӱдерже Юл кундем федерал округышто эн сайлан шотлалтын да Россий Федерацийысе перинатальный рӱдер-влакын рейтингыштышт 55 участник коклаште 7-ше верым налын. А РФ Тазалык аралтыш министерствын Академик В.И.Кулаков лӱмеш Акушерствым, гинекологийым да перинатологийым медицине велым шымлыме национальный рӱдерын эртарыме медицине полышым организоватлыме качествын рейтингыштыже республикын акушерский да неонатальный службыжо элыштына 1-ше верыш лектын.
Тыгай чапле результатыш эн ончычак «Здравоохранений» национальный проектын «Марий Эл Республикыште икшыве-влаклан медицине полышым пуаш кызытсе инфраструктурым ыштен, йоча здравоохраненийым вияҥдыме программе» регионысо проектым илышыш пуртымо кышкарыште азам ышташ полшымо тӧнеж-влакым чоҥымо да кызытсе медицине оборудований дене шыҥдарыме кӱшеш шумо.
Ӱмаште регионыштына ик ияш марте йоча-влакын колымо чотышт 26 процентлан иземын, тидыже Российысе показатель деч 9,8 процентлан шагалрак. Аза-шамычын икымше куд суткаште колымо чотыштат 14,3 процентлан иземын да Российысе показатель деч 2,3 пачаш шагалемын.
Акушер стационарлаште чот изи нелытан йоча-влакын илен лекме чотышт 86,4 процент марте кугемын да элысе показатель деч 9,8 процентлан саемын.
Ӱмаште республикыштына ава-шамычын колымо случайыштым пеҥгыдемдыме огыл.
2023 ийыште Марий Элын Перинатальный рӱдерыштыже республикысе 82 процент мӱшкыран ӱдырамаш азам ыштен.
М.ИВАНОВА
Снимкыште: Перинатальный рӱдерын оперзалже
М.Иванован фотожо/ «Марий Эл» увер агентстве
