4 мартыште Карелийын национальный книгагудыж ден С.Г.Чавайн лӱмеш национальный книгагудын полшымышт дене «Карелий – Марий Эл» телекӱвар эртаралте.
Тудо «Марийцы Карелии» мер ушемым ыштымылан 15 теммым палемдыме кышкарыште лие.
Марий тӱвыралан пӧлеклалтше «Мемнан деке унала толза!» касыште марий калыкын унала коштмо, унам вашлийме-ужатыме йӱлаже-влак, могай мурым мурымо, могай чес дене вашлийме да сийлыме нерген мутланышт. Марий Эл деч тӱҥ ойлышо (спикер) «Саскавий» марий ӱдырамаш ушем лийын. Рашрак каласаш гын, ушем лӱм дене культурологий доктор Галина Шкалина ойлыш. А тылеч ончыч тидын нерген кӱчыкын Шернур районын ӱдыржӧ, кызыт Карелийыште илыше да «Марийцы Карелии» мер организацийын исполнительный директоржо Алевтина Войтович палдарыш.
Карел-влакын тыгаяк йӱлашт нерген Российысе науко академийын Карелийысе научный рӱдержын этнологий секторжын научный пашаеҥже Сергей Минвалеев каласкалыш.
Марий Эл велым касыш погынышо-влак лӱм дене «Саскавий» марий ӱдырамаш ушем вуйлатыше Людмила Кошкина, кумдан палыме сӱретче Иван Ямбердов, Марий книга савыктыш директор Эдуард Иманаев ойлышт. Нуно чыланат умбакыже кылым эшеат пеҥгыдемдаш кӱлмым палемдышт. Иван Михайлович марий калык мурым акапельно муралтыш. Тудын деке погынышо-влакат ушнышт.
Марий тӱвыралан пӧлеклалтше мероприятий лиймым шотыш налын, Карелийыште чумырымо «Акрет мари» ден «Шулдыр» ансамбль-влак марий муро ден такмак-влакым йоҥгалтарышт. Марий Эл велым касым «Ныжыл сем» ансамбль сӧрастарыш.
Любовь Камалетдинова
Авторын фотожо
