Энергетике
Иктешлыме, наградым кучыктымо
Липецк областьын губернаторжо Игорь Артамонов да «Рӱдӧ Россеть» ден «Рӱдӧ да Юл кундем Россетьын» генеральный директоржо Игорь Маковский энергокомпанийын 11-ше профессионал коллегийжын площадкыштыже энергетик-влаклан регионал ден корпоратив наградылам кучыктеныт.
Липецк областьым вияҥдымашке кугу надырым пыштымылан «Липецк область ончылно заслугылан» отличий знак дене энергокомпанийын генеральный директоржо Игорь Маковский наградитлалтын. Липецк областьын генеральный директоржо деч наградым тыгак компанийын 5 пашаеҥже налын.
Электросеть комплексым вияҥдымашке кугу надырым пыштымылан да шуко ий тыршен ыштымылан «Россеть» ПАО-н Почётан грамотшо да Тауштымашыж дене энергокомпанийын латкум пашаеҥже палемдалтын. Нунын кокла гыч иктыже – «Мариэнерго» филиалын Самырык-влак советшын председательже Дмитрий Ильин (снимкыште). Пашаште кӱкшӧ результатыш шумылан энергокомпаний вуйлатыше эше лу пашаеҥлан корпоратив наградылам кучыктен. Тылеч посна Игорь Маковский «Липецкэнергон» шым энергетикшылан боевой действий ветеранын удостоверенийжым пуэн.
Эртыше ийым иктешлыме почеш кӱкшӧ показательыш шумылан, тыгак энергокомпаний-влакын филиалышт кокласе рейтинг негызеш сеҥышын кубокшо дене «Брянскэнерго» наградитлалтын, кокымшо верыш «Воронежэнерго», а кумшыш «Владимирэнерго» филиал-влак лектыныт. Сай лектышыш шушо да эн сайын автоматизироватлыме район электросетьлан «Калугаэнергон» Боровский РЭС-шым шотлымо.
«Шуко тӱжем еҥан пашаче ешнам пашам пайдалын ыштымылан да пырля сеҥымашке шумылан таум ыштен саламлем. Мемнан профессийым эреак пагален онченыт да пагалат, вет илышнан йӧнан улмыжо да экономикын вияҥмыже энергосистемын сайын ыштымыж дене кылдалтыныт. Тачысе условийыште энергетикын пашаж деке йодмаш палынак кушкын. Тау тыршен ыштымыланда», – каласен Игорь Маковский.
«Рӱдӧ Россеть» ден «Рӱдӧ да Юл кундем Россеть» мемнан стратегический партнёрна улыт. Липецк областьлан 70 ий темме идалыкыште тидыже поснак кӱлешан, вет регионнан шумо сеҥымаштыже кугу верым энергетике налеш. Компаний пашаеҥ-влакын профессионализмышт да тыршен ыштымышт регионлан кӱлешан проектлам илышыш пурташ да кызытсе условийыште пеҥгыдылыкым арален кодаш полшат», – палемден Игорь Артамонов.
Ю.ИСАКОВ ямдылен.
Фотом ИнформБюро телеграмм-канал деч налме
