Тенийысе ийым Российыште Элым аралышын идалыкшылан увертарыме. Тидым шотыш налын, «Жена героя. Мать героя» Всероссийский патриотический фотопроектын пашаже умбакыже шуйна.
11 февральыште куснылшо тиде ончер Медведево районысо Знаменский тӱвыра рӱдерыш толын шуын. Актовый залышке ты районышто шочын-кушшо герой-влакын пелашыштын, тиде кундем гыч улшо ава-влакын чылаже 16 фотографийыштым вераҥдыме ыле. Нунын кокла гыч икмынярышт дене вашлиймаш эртаралте. Вашлиймашыш тыгак Медведево район гыч СВО-што вуйыштым пыштыше эрге-влакын авашт, ачашт, верысе школын туныктышыж ден кугурак класслаштышт тунемше-влак толыныт.
Тӱҥалтыште «Жена героя. Мать героя» всероссийский фотопроектым Марий Элыште илышыш пуртышо вуйлатыше, «Защитники Отечества» фондын филиалжын социальный координаторжо Елена Чемоданова республикыштына ты паша кузе шукталтме дене палдарыш. А вара специальный военный операцийыште вуйжым пыштыше эргыж нерген уло чонжым пыштенак каласкалыш. Фотопроектыш ушнышо ӱдырамаш-влак кажныже шке пелашыштлан але эргыштлан серышым возеныт. Нуным фотографийышт пелен вераҥдыме. Елена Ивановна Павел эргыжлан серыме корнылажым лудын пуыш. Тушто, паледа, тугай чон корштымаш да тыгодымак кугешнымаш шижалтеш!
СВО-што ӱмыр лугыч лийше, верысе школын выпускникше Владислав Рыбаков нерген каласкалаш аважым, Татьяна Юрьевнам, погынышо-влак ончыко лекташ ӱжыч. Но олмешыже ачаже Олег Юрьевич лекте да, шинчавӱдшым ӱштын шинчыше пелашыже ӱмбаке чаманен ончалын, пелештыш: «Тудо таче ойлен ок керт. Тидым мый ышташ тыршем». Чынак, шкежат тыршышак веле, молан манаш гын, кажне гаяк ойжо деч вара шинчаже утыр йошкаргыш, шинчавӱдшӧ йоген волыш да мутшо кӱрылт-кӱрылт лекте. Тыгайым ончаш, колышташ моткоч йӧсӧ. А каласкалыше да колыштшо ача-ава-влакын чоныштышт тыгодым мо ышталтын?! Санденак Чечня сарын геройжо Рустам Сафинын ачаже Магнуф Каюмович, ойлаш лекмекше, вигак тыге тӱҥале: «Те шонеда, вуйыштым пыштыше эрге-влакын авашт гына шортыт? Ачаштат шортыт!» Да илалше еҥ ик жаплан шыпланыш. Шинчавӱд пырче-влак шӱргыжым нӧртен волышт. Шкенжым виешак манме гай кидыш налын, тудо эргыж нерген мутшым умбакыже шуен керте. Мучаште ача-ава-влаклан тыланымашым ойлыш:
– Чонланда кеч-кузе йӧсӧ гынат, шкендам аралыза. Тазалыкдам пеҥгыдемдаш тыршыза. Тидлан санаторийыш миен толаш тыршыза, эмлалтса. Ме ончыкылык верч, шочшына, уныкана-влак верч илышаш улына.
Афган сарын ветеранже, УФСИН-ын уголовно-исполнительный системыжын отставкыште майоржо Игорь Тойшевымат тиде мероприятийыш Афган сарыште лиймыж нерген шарналтен каласкалаш ӱжыныт. Но тудынат кумылжо тодылто, да ойжо кӱчык лие.
Пелашыже, Маргарита Геннадьевна, «Саскавий» марий ӱдырамаш ушемын вуйвержын еҥже, пеҥгыдын ойлен керте. Тудо Герой-влакын аваштлан, ачаштлан, пелашыштлан тауштена, мланде марте вуйнам савена да нунын дене кугешнена манын каласыш.
Людмила Кошкина «Саскавий» ушем вуйлатыше моткочак кӱлешан тыгай вашлиймашым эртарымылан тауштыш да палемдыш:
– Тиде нунылан, вуйыштым пыштыше эрге ден марий-влаклан огыл, а мыланна, илыше-влаклан, кӱлеш. Ава, пелаш-влак, тендан ойгыдам моткоч сайын умылем, молан манаш гын шкежат кызыт специальный военный операцийыште улшо офицерын аваже улам. Ме тыште тыныс кава йымалне илена. А тушто улшо-влак мом чытат? Нунын нерген ме мондышаш огынал. Те, тунемше-влак, тыныс илышна верч вуйыштым пыштыше-влакым шарныза, шкем шуарыза, илышыште кеч-моланат ямде лийза.
Марий ӱдырамаш ушемын тыгай поро йӱлаже уло – ойыртемалтше ӱдырамаш-влаклан лӱмгече але кугу пайрем лӱмеш кугу шовычым пӧлеклаш. Тиде вашлиймаштат герой-влакын авашт дене чон шокшышт дене пайлалтме семын Маргарита Геннадьевна ден Людмила Ивановна вачышкышт шовычым пыштышт.
Мероприятийым верысе тӱвыра пӧрт пеленысе «Яблоневый цвет» ансамбль сӧрастараш полшыш. Вашлиймашым тудо «А жизнь продолжается» муро дене мучашлыш.
Чынак, илыш умбакыже шуйна. Кеч-кӧлан кеч-могай ойгым чытен лекташыже логалеш гынат, илаш вийым кузе-гынат муман.
* * *
Тиддеч икмыняр кече ончыч Знаменский школышто СВО-ланак пӧлеклалтше мероприятий эртен. Ты школын выпускникше, спецоперацийыште вуйжым пыштыше Владислав Рыбаков лӱмеш Геройын партшым торжественно почыныт.
Мероприятийыште рвезын аваж ден ачаже Олег Юрьевич ден Татьяна Юрьевна лийыныт. Тушко тыгак Афган сарын ветеранже, УФСИН-ын уголовно-исполнительный системыжын отставкыште майоржо Игорь Тойшев, пелашыже, «Саскавий» марий ӱдырамаш ушемын вуйвержын еҥже Маргарита Тойшева, СВО-што геройлын ӱмыр лугыч лийше Станислав Изергинын ачаж ден аваже Александр Эрикович ден Татьяна Ивановна толыныт.
Партым почмо годым Владислав Рыбаковын школышто сайын тунеммыж, весела, поро кумылан лиймыж, мер пашашке чолган ушнымыже, кушто службым эртымыже, вараже пашам ыштымыж нерген шарналтен ойленыт. СВО-шко тудо мобилизацийым увертарымеке икымше кечынак, 2022 ий 22 октябрьыште, каен. 9 февральыште Луганский калык республикыште Сватово ола воктене илышыже кӱрылтын. Владислав Рыбаков Мужество орден дене палемдалтын.
Геройын партше коклаште икымше шинчаш чапым 6 «А» классыште тунемше Максим Гурьев ден 8 «А» классыште шинчымашым погышо Софья Иманаева сайын тунеммышт да чолга улмышт дене суленыт. Ончыкыжымат ты парт коклаште эн ойыртемалтше тунемше-влак гына шинчаш тӱҥалыт, палемден школ директор Наталья Гурьевна Горячева.
Тыгай мероприятий-влак самырык-шамычым элнам эшеат чот йӧраташ, тудын дене утларак кугешнаш таратат да чын патриот кушкашышт полшат манын, моткочак ӱшаныме шуэш.
Любовь Камалетдинова
Авторын фотожо
