УВЕР ЙОГЫН

Моторлык тӱням арала

Моторлык тӱням арала

Моторлык тӱням арала, маныт калыкыште. Но моторлыкым кажне айдеме семынже умыла. Мутат уке, эн ончыч шинча ончылно лывырге капкылан, чевер чуриян сымыстарыше ӱдыр сӱретлалтеш. Варажым, шукыж годым  айдемын кӧргӧ чонжо, арулыкшо аклалтеш. 

Таче мутем Юл кундем гыч ик чевер, мотор ӱдыр Татьяна Яковлева нерген. Ты кечылаште тудо Пермьыште «Юл кундемын Татьянаже-2019» конкурсышто мастарлыкшым ончыкта. 2018 ий шошым марий ӱдыр республик кӱкшытан  «Студенчествын миссше-2018» конкурсышто сеҥыше лийын. Тыгак тунам «Ончышын кумылжо» номинацийыште палемдалтын. Ноябрьыште тылзын, Севастопольышто эртаралтше «Россий студенчествын мисс ден мистерже-2018» конкурсышто Марий Элын чапшым аралаш лач тудлан ӱшаненыт. 37 участник коклаште «Грацийын миссше»  номинацийыште палемдалтын.

 

Тӱҥалтышым – Чоткар кундемыште

Татьяна Яковлева Волжский районысо Корамас кундем, Нурмучаш ялыште шочын. Изинекак спортлан кумылаҥын, моторлыкым йӧратен, Чоткар мланде деч вийым налын, уш-акылым поген кушкын.

– Чоткар мландыште шочмыжат тудлан шӱкалтышым ыштен. Верысе курык кокла гыч шыргыктен йогышо яндар вӱдым йӱын, гӱжлен шогышо чодыра воктенысе южым шӱлалтен кушмыжат, сылне пӱртӱсат айдемылан кӧргӧ вийым, нимучашдыме пиалым, шонем. Ялысе пашаште шуаралтмат йочам шке семынже пойдара, – манеш аваже Надежда Николаевна. – Эн ончычак Кугу Корамас школын туныктышо коллектившылан кугу таум ыштем. Кеч-могай йочан илыш корнышкыжо негызым школышто пыштат. Кузе туныктышо-влак тунемшыштым моштен савырал колтат, ончыкылыкышт тугай лиеш. Марий йылмым йєрата, почеламутымат возен, пайремлан сценарийымат ямдылаш тыршен.

 

Шаршудан йолгорнат…

Танюш икымше классыш Кугу Корамас кыдалаш школыш моткоч куанен каен. Кажне кечын тунемаш кум километрым йолын эртыман да мӧҥгеш – тынарак. Тыге айдеме физически шуаралтын. Ончыч ӱдыр вожылшырак, єрмалгышырак лийын гын, школышто чолгалык ешаралтын. Икымше классыштак сценыш лекташ тӱҥалын. Кыдалаш класслаште школ илышыш, мер пашаш кумылын ушнен. Чыла предмет, манаш лиеш, чонжылан лишыл лийын. Поснак – шочмо марий ден йот йылме-влак. Англичан йылме дене сайын мутлана. Ты предметым вӱдышӧ Р.Захарова тунемше-влакым йылмым келгынрак палаш туныктен. Лач тидлан кӧра марий ӱдыр йот йылме факультетыш тунемаш пурен.

 

Сеҥымаш

Татьяна – район, республик да Россий кӱкшытан тӱрлӧ конкурсын сеҥышыже да призёржо. «Ал сескем» йоча организацийын чолга участникше лийын. 2013 ийыште районын чапшым республик кӱкшытан «Самырык лидер» конкурсышто арален. Чолгалыкше да усталыкше дене конкурслаште ойыртемалтмыжлан Москош, Кремль ёлкыш, миен толаш йӧным ыштеныт. Шымше классыште финн-угор лагерьыште чолгалыкшым ончыктен. «Орлёнок» йоча рӱдерыште шинчымашыжым келгемдашыже йӧн пуалтын. Сценыш лектын, почеламутым лудмыжымат шукын куанен колыштыныт. Республик кӱкшытан Чавайн лудмаште икымше вер дене палемдалтын. Тыгак регион-влак кокласе «Юзо руш мут» конкурсышто икымше лийын. Регион кӱкшытан «Вишневский лудмаш» конкурсышто ончыко лектын.

Англичан йылме дене всероссийский олимпиадын муниципал этапыштыже кум гана икымше верым налын да тӱрлӧ кӱкшытан моло конкурсыштат призёр лийын. Биологий, марий йылме, руш йылме дене эртаралтше олимпиадылаште ик гана веле огыл сеҥыше радамыш логалын.

 

Спорт

Татьяна физкультур дене таҥлалтын, спортлан шӱмаҥын. Тудлан  поснак спорт ориентирований лишыл. Тидланже жапше годым ачаже, физкультурым туныктышо Руслан Викторовичын (ӱмыр лугыч лийын) кумылаҥден. Спорт ориентирований дене «Российский азимут» таҥасымаште кубокын озаже лийын. Тыгак ты вид дене  Марий Элын первенствыштыже кӱчык да кужу дистанцийыште кумшо вер дене палемдалтын. Кумшо разрядым шуктен.  

Таза илыш-йӱлам кучымо шотышто ӱдыр ачажын корныжым тошка. Арам огыл калыкыште маныт: «Капкыл таза, уш-акыл пӱсӧ лийыт гын, кеч-могай шонымашкат шуаш лиеш».  

Кызыт Татьяна Марий кугыжаныш университетын йот йылме факультетыштыже кумшо курсышто тунемеш.

Тек самырык марий ӱдырын ончыкылыкшо волгыдо лиеш, творческий шӱлышыжӧ ешаралтеш, у сеҥымашыж дене родо-тукымжым, шке калыкшым куандара.

Е.Эшкинина.

Опубликовать в Одноклассники

Добавить комментарий