Тений 1 январь гыч 14 март йотке у коронавирус инфекций деч вакцинацийын тичмаш курсшым да ревакцинацийым эртымылан 60 ияш да тылеч кугурак ийготан еҥ-шамычлан кугыжаныш велым 2 тÿжем теҥге кугытан кумылаҥдыше выплатым ойырымо нерген возенна ыле. Таче ты шотышто сÿрет могайрак? COVID-19 деч прививкым ыштыктыше-шамыч ешаралтыныт мо? А выплатым налашлан йодмашым пуат мо?
– Сÿрет удажак огыл. 60 ияш да тылеч кугурак ийготан еҥ-влак коклаште вакцинаций ден ревакцинацийым эртыше-шамыч палынак ешаралтыныт, выплатыланат йодмашым кечын пуат. Мутлан, 26 январьлан налмаште 500 йодмашым регистрироватлыме, – маныт Марий Элын Калык илышым саемдыме шотышто министерствыжын пресс-службыштыжо.
Ушештарена: палемдыме выплатым Марий Элыште илыше Россий Федерацийын 60 ияш да тылеч кугурак ийготан кажне гражданинже налын кертеш. Вакцинацийын тичмаш курсшым але ревакцинацийым эртыме деч вара нине еҥлан илыме кундемысе калыклан социальный полыш мере-влакым пуымо рÿдерыште але МФЦ-н офисыштыже йодмашым возыман, тудын пелен у коронавирус инфекций деч вакцинацийым эртыме нерген сертификатын, СНИЛС-ын да паспортын копийыштым, оксам колташлан реквизитым пыштыман. Йодмашым вакцинаций пунктыштат налаш лиеш. Иктажлан рÿдерыш але офисыш миен толаш йöндымö гын, тиде пашам олмешыже родыжо але ÿшанъеҥже шуктен кертеш. Документым социальный пашаеҥ-шамычат погаш полшат.
Окса йодмашым пуымо деч вара 10 паша кече жапыште ойыралтеш.
Шотыш налза: документым 2022 ий 31 март йотке гына налыт.
М.ИВАНОВА
