25 октябрьыште Ленинград область Киров районысо «Невский пятачокысо» интернациональный шарнымаш аллейыште Кугу Отечетвенный сар годым Марий кундем гыч Ленинград велне вуйым пыштыше салтак-влак лӱмеш мемориал стелым торжественно почыныт.
Мероприятийыште Марий Эл вуйлатыше Юрий Зайцев да Ленинград областьын губернаторжо Александр Дрозденко лийыныт.
Марий АССР гыч лекше салтак-влак тӱрлӧ калык илыман элнан чыла республикылаж гыч салтак-влак дене пырля тушто лӱддымын кредалыныт. «Мы вместе защищали Ленинград» Шарнымаш Книга почеш, Марий Эл гыч тушто 4469 еҥ сусырген колен да увер деч посна йомын.
Юрий Зайцев шарныктышым шогалтыме проектын организаторжо-влаклан, тыгак Ленинград областьым вуйлатышылан ты йодышым шотыш кондаш полшымыжлан тауштен.
«Йӱдвел рӱдолаштына ты мемориалым шогалтыме нерген йодыш шукертсек каҥашалтын. Ты шотышто темлымашым кодшо ийын Марий Эл Республикын ветеран-влакын организацийышт ыштеныт. Мый темлымашым сайлан шотленам. Шарныктышым шогалтымаш – мыланна чылаланна кугу событий. Ленинград блокадым кораҥдымылан 80 ий эртен, фашист Германийым тӱрыс кырен шалатымылан – 79 ий. Но кычалме пашам але мартеат шуена», – каласен Юрий Зайцев.
«Ленинград мландыште совет салтак ден тыныс илыше-влакын вӱрышт шуко йоген. Тыште Совет Союзын чыла кундемже гыч салтак-шамыч кредалыныт. Арам огыл Шарнымаш аллейым ыштымым Российын чыла регионыштыжо сайлан шотленыт. Ме Ленинград блокадын шучко кечылаже, кокымшо тӱнямбал сарыште кӧ сеҥыме нергенат сайын шарнена. Юрий Викторович, Тендан гоч мый сенатор, депутат, мер организаций, ветеран-шамычлан тауштынем. Таче тыште Марий Эл Республикын рубежный кӱжӧ почылтеш. Россий Федерацийын тыгай изи рубежный кӱжӧ-влак мемнан кугу ойгына да кугу сеҥымашна-влак нерген шарныктат», – палемден Александр Дрозденко.
Россий Федераций президентын кӱштымашыж почеш, Марий Элыште регионын чыла илемжым авалтыше электрон Шарнымаш Книга-влак ышталтыныт. Ты пашам Санкт-Петербург ден Ленинград областьысе марий-влакын «Ший корно» калыкле-тӱвыра автономийыштат шукта. Тачысе кечылан кок тыгай книгам савыктен лукмо.
«Таче нацизм мемнан элысе калыклан угыч лӱдыкшым ышта, историй факт-влакым шояклен ончыкташ тырша, но ме шкенан ачана, кочана, кугезе кочана-влакын подвигыштым шарнена, сандене тидым ышташ огына пу. Тыныс илыш верч вуйым пыштыше салтак ден офицер-влак ончылан вуйнам савена. Нине герой-влакын подвигышт ончыкылык тукымын чоныштыжокодеш», – ешарен Марий Эл вуйлатыше.
Торжественный церемонийын участникше-влак Ленинградым аралыше- влакым ик тат шып шоген шарналтеныт да у мемориал воктеке пеледыш аршашым пыштеныт.
Марий Эл вуйлатышын пресс-службыжын уверже негызеш Светлана Носова ямдылен
