Марий Элысе Калык тӱвыра рӱдер Санкт-Петербургысо Калык-влакын пӧртышт дене ваш келшен пашам ыштыме нерген ойпидышым ыштеныт.
Шке кидпалыштым Марий Элын Калык усталык да тӱвыра-каныме паша шотышто шанче методике рӱдер вуйлатыше Эльвира Куклина ден Санк- Петербургысо Калык-влакын пӧртыштын директоржо Александр Карлов пыштеныт. Александр Николаевичын аважат марий улмаш. Тидын нерген Эльвира Викторовна соцкылысе лаштыкыштыже увертара. Тыгак тудо Нева эҥер пеленысе олаште Санкт-Петербургысо Калык-влак кокласе кыл да миграционный политикым шуктым шотышто комитет председательын алмаштышыже Алексей Силкин дене вашлийын. Нине вашлиймаш дене кылдалтше чыла мероприятий Кугу Отечественный сар годым Ленинград блокадым кӱрлмылан 80 ий теммылан пӧлеклалтын да Санкт-Петербургышто Марий Элын полномочный представительже Елена Танникован тыршымыж дене эртен.
С.Носова
Снимкыште: ойпидышым ыштыме годым.
Фотом Э.Куклинан еш альбомжо гыч налме
