Тачысе лаштыкын унаже – Йошкар-Олаште илыше, «Ший оҥгыр» йочасадыш коштшо вич ияш чолга марий ӱдыр Элика Тетерина. Тудо чӱчкыдын аваж дене пырля тӱрлӧ мероприятийлаште лиеда.
– Ӱдырнам марий шӱлышеш куштена. Марий лӱмым пуэнна – Элика, шымалыкым, ласкалыкым ончыкта. Шочмыж годсек эре марла мутланенна, кызытат тыршена. Но, йочасадыш кошташ тӱҥалмекыже, марий йылмым писын мондыш. Чыла вере рушла кутырат, садлан тудат ты корно дене кайыш. Туге гынат, марий шӱлышым чонышкыжо шыҥдаренак кодаш манын, мый тудым пырля марий мероприятийлашке коштыктем. Мутлан, шукерте огыл, марий вуйчиемлан пӧлеклалтше этнофорумыш миенна. Тушто тудым марла тӱрлаш туныктеныт. Тыгак йоча марий спектакльыш коштына, марий книгам лудына, почеламутым, мурым тунемына, эсогыл марий кочкышым пырля ыштена, – манеш Эликан аваже Екатерина.
Шукерте огыл ӱдыр «Сылнымут аршаш» конкурсышто шке усталыкшым терген. Йочасадыштыже вич-шым ияш коклаште кокымшо верым налын. Ты моштымашыжым ӱдыр ончычат шагал огыл таҥасымаште ончыктен. Мутлан, Сеҥымаш кечылан пӧлеклалтше ик конкурсышто икымше верым налын. Тунам тудо Н.Золотарёвын «Пытартыш ветеран» почеламутшым лудын.
– Декабрьыште эртаралтше «Сылнымут аршаш» конкурслан икмыняр почеламутым темленам ыле. Тудо Анатолий Мокеевын «Реве» лӱманжым ойырен налын. Йочалан келшен гын, кузе тореш лият? Кумылжым нӧлталаш шонен, шкежат артистла койын лудынам. Элика кид дене кадыргыл ончыктымем шарнен кодын. Конкурсышто тыгак койышланаш тыршен. Сандене, очыни, кокымшо верым пуэныт. Тидлан ме моткоч куаненна.
Кугу таум «Ший оҥгыр» йочасадысе «Пампалче» группын воспитательже Лариса Витальевна Ивановалан каласем. Тудо эре полшен шога, – мутым шуйыш Екатерина.
Яра жапшым Элика эре оҥайын эртараш тырша. Утларакшым сӱретлаш йӧрата. Пластилин, пӱгыльмӧ, ватке, пӱйым эрыктыме паҥга да моло наста гычат поделке-влакым ыштылеш. Тыгак театр, музык, ритмопластике, куштымаш, кидпаша да англичан йылмым тунеммаш кружоклаш коштеш.
Ӱдыр йылмым, йӱлам, марий койышым ынже мондо манын, ача-аваже пеш кугу вийым пыштат.
О.МОШКИНА
