Кодшо рушарнян У Торъялысе модельный рӱдӧ книгагудышто «Папин день на Шукшане» еш слет лийын.
Тудо «Ашнаш налше еш але Йоча пӧрт олмеш еш» социальный фестиваль дене келшышын эртен. Ойыртемалтше мероприятийын организаторжо-влак У Торъял муниципал районын депутат-влак погынымашыже, район администрацийын тӱвыра пӧлкаже, Шӱкшанысе богатырский заставе, рӱдӧ книгагудо лийыныт. Слетым эртарымаште кугу полышым тыгак «Пеҥгыде еш» партпроект ден ашнаш налше еш-влакын «МариЯ» ассоциацийышт пуэныт, возымо модельный книгагудын сайтыштыже.
Ачан кечышкыже Йошкар-Ола ден Краснооктябрьский, Кужэҥер, Морко, У Торъял поселкыла, Лӱльпан, Сардаял гыч чылаже 9 еш, тыгак Лӱльпан йоча пӧрт гыч команде погыненыт. Нуно Шӱкшан богатырский заставыште, Элембай черкыште, У Торъялысе модельный рӱдӧ книгагудышто экскурсий дене лийыныт. Тылеч вара «Патырын вийже» турнирыш да «Руш мландын патырже-влак» еш викторине сынан йодыштмаш-модышыш ушненыт.
Л.Камалетдинова