Йошкар-Оласе 24-ше №-ан школышто «Во славу кадетства» монументым почыныт. Тиде – Марий Элыште кадет-влаклан пӧлеклалтше икымше шарнымашан сооружений.
Ты тунемме верыште МЧС-ын кадет корпусшым ыштымылан 14 ият лиеш. Шинчымаш кечын эртыше почмаште Марий Элыште Россий МЧС-ын гражданский обороно да калыкым аралыме виктемжым вуйлатышын пашажым жаплан шуктышо Сергей Бакланов лийын. Тудо йоча-влакым у тунемме ий тӱналме дене саламлен да кадетын лӱмжым эреак кӱшнӧ кучаш тыланен. Вашешыже ӱдыр-рвезе-влак моштымашыштым ончыктеныт: куштеныт, вальсым пӧрдыныт.
