8 июль – Еш, йӧратымаш да икте-весылан ӱшанле улмо кече. Тидым шотыш налын, пӱтынь Россий Федераций мучко загслаште ты кечын «Ойырлымаш деч посна кече» акций эртаралтеш.
Тыге Марий Элысе загс-влакат ты акцийыш ушнат да шочмын нигуштат ик мужырымат огыт ойыро, ойырлаш йодмашымат огыт нал. Тидыже ешым арален кодаш, ойырлымашым шагалемдаш шонымаш дене эртаралтеш.
Мужыр-влак тӱҥ шотышто кугарнян да шуматкечын ушнат. Ешым чумыраш южышт ойыртемалтше числам, кечым, пайремым ойырен налыт. 8 июльыштат шагалын огыл возалтыт. Но тений тудо шочмын лиеш гынат, садак республикыштына 10 еш мужыраҥаш ойым пидын.
Тыге Еш, йӧратымаш да икте-весылан ӱшанле лийме кечын республикысе 3 загсыште Медельсонын маршыже йоҥгаш тӱҥалеш. Эн шукын, 7 мужыр, Медведево районышто ешым чумыра. Кок у еш Советский районышто шочеш. Эше ик мужыр Курыкмарий районышто возалтеш.
Тек нунылан Пётр ден Феврония пиалан лияш полшат, вет лач нине шнуй-влак ешым аралышылан шотлалтыт.
Л.Камалетдинова
Авторын фотожо
