УВЕР ЙОГЫН

Форум: «КРАВЕЦ» шокшын вашлийын

23-29 июльышто Курыкмарий район Кулаковы селасе Красноволжский школышто самырык-влакын культурно-исторический «КРАВЕЦ» форумышт эртен. Тудо визымше гана шке омсажым почын. Тушко 100 наре ӱдыр-рвезе чумырген. 

Арня жапыште форумыш толшо-шамыч тӱрлӧ конкурсышто, спорт таҥасымаште вийыштым тергеныт. Мастарлыкыштым мастер-класслаште нӧлтеныт, шинчымашыштым лекцийыште, «йыргешке ӱстелыште» пойдареныт, капкылыштым йогаште пеҥгыдемденыт, гитар дене шокташ, марла кушташ тунемыныт. Нунылан Курыкмарий кундемын тоштерже-влак дене палыме лияш, пляжыште капым кӱкташ йӧн лийын. «Лӱдмаш йолгорно» квест сынан модыш шукыштлан шарнымашеш кодын.  

Тений форумыш чумыргышо самырык тукым проектым возен да тудым арален. Кажне кече посна темылан пӧлеклалтын да конкурс сынан лийын. Тыгак ӱдыр-рвезе-шамыч футбол дене тӱнямбал чемпионатыште волонтёр семын участвоватлыше-влак дене вашлийыныт. Нуно тӱнямбал таҥасымаште налме опытышт нерген каласкаленыт.

Палемдыман, тений форумын кузе эртымыжым интернетыштат ончаш лийын. Марий кундемын самырык тукымжылан тыгай кугу пӧлекым форумым эртарыше-влак Россий Президентын фондшын грантшым сеҥен налмылан кӧра ыштен кертыныт.

Л.ШАБДАРОВА.

Опубликовать в Одноклассники

Добавить комментарий