Марий Элыште 65 ий деч кугурак 14 тӱжем наре илалше еҥ кочкыш наборым налын.
Регионыштына #МеПырляУлына всероссийский акций умбакыже шуйна. Тудын кышкарыштыже илен лекташ кӱлмӧ 1,5 кугыт (12 тӱжем теҥге) деч изи доходан 65 ий деч кугурак граждан-шамычлан кочкыш набор ойыралтеш. 500 теҥге деч шерге огыл наборыш шӱрашым (рис, шемшыдаҥ, шӱльӧ лапчык), пурсам, макароным, сакырложашым, шинчалым, кечшудо ӱйым, тушёнкым, чайым пыштыме.
28 май йотке тыгай наборым республикысе районлаште да олалаште илыше 13900 гражданлан намиен пуымо.
Ушештарена, #МеПырляУлына всероссийский акцийым «Волонтёр-медик-влак» всероссийский мер толкын, Волонтёр рӱдер-шамычын ассоциацийышт да Общероссийский калык фронт организоватленыт.
65 ий деч кугурак илалше еҥ-влаклан полшашлан окса фондым ыштыме. Тудын средстваж дене регионысо коммерческий огыл организаций-влак кочкыш наборым ямдылат да адресат деке мӧҥгышкыжак намиен пуат. Икымше поро кумыл ошкылым «Альфа-групп» консорциум ыштен, тудо илалше-шамычлан полшымо фондыш 1 млрд. теҥгем колтен.
Республикыштына тиде пашам шукташ Медиапроект ден социальный тӱҥалтышым вияҥдыше «Поро Марий Эл» региональный поро кумыл мер организацийым палемдыме.
М.ИВАНОВА
