Общероссийский калык фронтын чолга еҥже-влак Волжский районын кучемже деч Сотнур селасе Набережный уремын 2-шо №-ан шӱкшӧ пӧртыштыжӧ илыше пенсионер туныктышо ден пелашыжым, жапым шуйкалыде, вес вере кусараш йодыт.
Вич ий ончыч районысо ведомство-влак кокласе комиссий пӧртым илаш йӧрдымылан шотлен. Тыге гынат ик пачерысе ешын илышыже сай велыш вашталтын огыл.
«Пӧрт кок пачеран: иктыштыже пелашем дене коктын илена, весыштыже ынде иктаж лу ий иктат уке. Пачер служебныйлан шотлалтеш, илыме верлан ордерым верысе школын туныктышыжо семын налынам. Приватизироватлынем ыле, но ышт пу. Пӧртым ынде шке вием дене олмыктен ом керт, адакше лӱдамат: ик мотор кечын тудо просто сӱмырла… Мемнам вес вере кусараш сӧреныт, но ала-молан кызытат теве тыгай условийыште илаш логалеш», – манеш 72 ияш Александр Павлов.
Пӧртым общественник-влакат ончен савырненыт да тудын аварийный улмыж дене келшеныт: негыз чот шелышталтын, шӱкшӧ пырдыж верын-верын шӱтлен, авагашта ден пуран ӱлыл ужашыже шӱйыныт, тувраш гыч вӱд вита, электровоштырын изоляцийже локтылалтын…
«Республикын Минстройыштыжо умылтарыме почеш, тиде пӧрт граждан-влакым шӱкшӧ илыме фонд гыч вес вере кусарыме региональный адресный программыш логалын огыл, молан манаш гын блокироватлыме оралтылан шотлалтеш. Тыге гынат ешым тыгай азапыште кодаш огеш лий. Жапым шуйкалыде, граждан-влакым вес илыме верыш кусарыме ешартыш мерым ышташ кӱлеш», – палемда ОНФ-ын Марий Элысе штабшын сопредседательже Руслан Гизатуллин.
Регионысо ОНФ-ын чолга еҥже-шамыч тиде ситуацийым контрольыш налыныт да пенсионер-влакым шӱкшӧ пӧрт гыч вес вере кусараш чыла йӧным кычалыт.
М.ИВАНОВА
