Изи Какшан серысе пляжыште шуко функциян спорткомплекс да йоча изи ола (городок) чоҥалтыт. Тушто профессиональный спортсмен-влак тренировкым эртараш, а спортым йӧратыше-шамыч физкультур дене заниматлаш тӱҥалыт. Пляж спорт дене таҥасымашым эртараш йӧн лектеш, тиде вид республикыштына кызытеш укеат. Тыгак мини-футболла, баскетболла, стритболла модаш площадке-влакым ыштат. Тидын нерген Юрий Зайцевлан спортын пляж видше дене Федерацийын председательже Сергей Канашин каласкален.
Объект «Сбербанк» ПАО дене пырля чоҥалтеш, проектын акше – 10 миллион теҥге. Тышеч 8 миллионжо – финанс-кредит тӧнежын средстваже. С.Канашинын мутшо почеш, тыгай комплексым чоҥымо федерал программе уке, сандене кок, а можыч, кум этап денат чоҥаш перна. Верысе инициативе-влак да «Оласе йӧнан среда» программылашке ушнаш шонат. Сбербанкын Юл-Виче банкын кумдыкым вияҥдыме программыже лийын, тиде программе почеш проектым арален кертыныт, оксаж дене резине дене петырыман площадкым ыштат. Икымше этап 1 ноябрь марте мучашлалтшаш.
«Пеш сай. Мыланем келша. Адакшым ола покшелне. Шонымашда шукталтше. Ыштен шуктымекыда, ӱжса, толам», – каласен Юрий Зайцев.
Изи Какшан серым да пляжым тӱзатыме пашам тергышыжла, Юрий Зайцев йоча олам чоҥымо паша палемдыме график деч почеш кодмым палемден: 1 августлан ямде лийшаш ыле. «Мостремстрой» компанийын директоржо Андрей Лежнин да олан мэрже Евгений Маслов йоча-влакым куандарыше объектыште пашам умбакыже писемдыме нерген ойленыт.
Марий Эл Республикым вуйлатышын организаций да аналитике виктемжын уверже почеш Л.СЕМЕНОВА ямдылен
Д.РЕЧКИНЫН фотожо
