Светофор «шинчажым пӱялеш»
Сай качестван да лӱдыкшыдымӧ корно» нацпроект почеш тений Йошкар-Оласе уремлаште у 624 корно знакым вераҥдыме, тышеч 441-ым – «Советский уремеш.
Тыгай пашам «Ола» МУП шукта, тылеч посна ты предприятий светофорым шогалтылеш. Январь тылзе гыч оласе уремлаште кум у светофор «шинчажым пӱалын», а чылаже 119 светофор йолешке-влаклан корно правил-влакым эскераш полша. Рӱдолан администрацийыштыже палемдыме почеш, корнысо знак-влакым ямдылаш «Ола» МУП-ын лӱмын келыштарыме оборудованийже, тыгак производственный кумдыкшат ситышын улыт. Мутлан, уремеш вераҥдыме пале-влакым ямдылыме годым волгыдым йымыктарыше плёнкым кучылтыт.
Ешарена, республик мучко тений 25 километр корным тӧрлымӧ. Тыге Марий Эл корным чоҥымо да олмыктымо дене Российыште лидерлан шотлалтше лу регион радамыш логалын.
Корным вончымо годым тӱткӧ лий!
Пытартыш жапыште Йошкар-Олаште йолешке-влакын автомашина йымак логалме случай ятырлан ешаралтын.
Ноябрь тӱҥалтыш гыч шым тыгай туткар лийын, визытше – Йошкар-Олаште. Тыгай лӱдыкшым кораҥдаш манын, Марий Элын Госавтоинспецийже корно гоч вончыктарыше «зебрлаште» ДПС-ын нарядшым ешарыме шотышто пунчалым луктын. Аварий чӱчкыдын лийме верлаште (3 деч шукырак ДТП да кушто еҥ-влак эҥгекыш логалыныт) ГИБДД-н пашаеҥже-влак эр еда дежуритлат. Мутлан, тыгай наряд Крылов уремыште шога, тыште кодшо каныш кечылаште кок еҥ машина йымак логалын, когыньыштымат эмлымверыш наҥгаеныт.
ГИБДД пашаеҥ-влак автомашинам виктарыше-влакым корно правилым эскераш, йолешке-влакым корным вончымо годым поснак тӱткӧ лияш йодыт.
Росгвардий класс почылтеш
Йошкар-Оласе 15-ше номеран кыдалаш школышто Национальный гвардий войскан специализированный классше почылтеш.
Марий Элысе Росгвардийын начальникше Геннадий Файзулин да школ директор Фаина Туманова (снимкыште) вашкыл шотышто ойпидышым пеҥгыдемденыт. Тудын негызеш Росгвардийын опытан пашаеҥже да военнослужащийже-влак тунемше-шамыч коклаште общевойсковой занятийлам, патриот шӱлышан спорт да тазалыкым шуарыме мероприятийлам эртараш тӱҥалыт.
Каласыман, Йошкар-Оласе 14-ше номеран гимназийыште да 19-ше номеран кыдалаш школышто кок ий ончыч Росгвардий кадет класс-влакым почмо.
Вашке У ий, йолташ-влак!
«Пандемий У ий пайрем кумылым локтылшаш огыл», – тыге ойлат Йошкар-Ола мэрийыште. Торгайыше, промышленность предприятий, учреждений вуйлатыше-влак дене ола администрацийыште совещаний лийын. Тушто У ийлан да Роштолан ямдылалтме, ола уремлан пайрем сыным пуртымо нерген каҥашеныт. Тений Ленин площадьыш у кожым шогалтат, тудын кӱкшытшӧ 25 метрыш шуэш.
Иман пушеҥгым (тӱҥ шотышто кожым да пӱнчым), нунын укшлажым ужалыше пазар-влакым почмо шотышто аукционым увертарыме. Аукцион электрон йӧн дене эртаралтеш, йодмашым 8 декабрь 11 шагат марте пуыман. Тыгай пазарым ныл вере почаш палемдыме. Чыла йодышым да кӱлеш кагазым администрацийын сайтыштыже, «Конкурс да аукцион» ужашыште, рашемден да муын кертыда.
Мэрийыштак каласыме почеш, телылан рӱдолаштына 13 катокым ышташ палемдыме.
Л.СЕМЕНОВА
Фотом интернет гыч налме
