Россий президент В.Путинын да элнан правительствыжын кӱштымашышт почеш, кеҥеж каныш жапыште икшыве-влаклан лагерьыш каяш путёвкым йоча туристический кешбэк программе почеш налаш теният йӧн ышталтеш. Тудо 2022 ий 31 мартыште йӱдым вийыш пура. Кешбэк дене каныме да тазалыкым пеҥгыдемдыме лагерьыш икшыве-влакым 1 май гычак колташ лиеш. Программе 30 сентябрь марте пашам ышта.
Ушештарена, путёвкым «МИР» карте дене тӱлыман. Тидын деч вара вич кече жапыште тудын пел акше (но 20 тӱжем теҥге деч шуко огыл) мӧҥгеш пӧртылталтеш.
Программыш кугыжаныш лагерь-влак гына огыл пурталтыныт, тушто коммерческий-шамыч (стационарный) улыт. Ик «МИР» карте дене икмыняр путёвкылан оксам тӱлаш лиеш, тыгодым тудыжо йоча-шамычын ачаштлан але аваштлан шотлалтшаш.
Йоча канышлан льготан сертификатан ача-ава-влакат кешбэк дене пайдаланен кертыт. Тыгодым сертификатыш ешарен тӱлымӧ оксан 50 процентшым (адакат 20 тӱжем теҥге деч шуко огыл) пӧртылтат.
Программыш ушнышо участник-влакын спискыштым, тыгак темлымашлам мирпутешествий.рф сайтын «Йоча лагерь-влак» посна лончыштыжо савыктат.
Тӱткӧ лийза, тергыза: каныме вер чынжымак кешбэк программын участникшылан шотлалтеш мо? Тудын пелен келшыше маркировко ончыкталтын мо? Спискыштат возалтын огыл, маркировкыжат уке гын, тугеже тудо кугыжаныш программыш пурталтын огыл, путёвкын акшат огеш пӧртылталт.
Г.Кожевникова
