Москвасе «Крокус Экспо» ончер рӱдерыште MITT туризм да унам вашлийме индустрий шотышто 32-шо тӱнямбал ончер почылтын.
Тӱҥ площадкыже 11-13 мартыште пашам ышта. Тудо кучемын, бизнесын еҥже-влакым да профессионал сообществым чумырен.
Марий Эл тушто кажне ийын шкенжым ончыкта, да тидын дене турист рынкыште шке вержым пеҥгыдемда, у партнёр-влак дене кылым ышта.
Республике гыч тушко «Шелковый путь», «Нельсон» туроператор-влакын, «Кленовая гора» санаторийын, «Мариленд» каныме базын, «Алатойс» модыш фабрикын, Звенигово калык кидмастар пӧртын, Йошкар-Оласе турист-увер рӱдерын еҥже, ресторатор, экскурсовод-влак да молат каеныт.
Делегацийыш «Герои Марий Эл. Талешке-влак» программын участникше Павел Поповат ушнен. Стажировко кышкарыште тудо кызыт регионын турист куатшым вияҥдыме проект дене пашам ышта. А тыгай ончер тудлан у шинчымашым налаш да опытым погаш полша.
«MITT ончер – Марий Элыш турист ден инвестор-влакым толаш кумылаҥдаш полшышо кугу событий», – палемден шке ТГ каналыштыже регион вуйлатыше Юрий Зайцев.
Фотом «Туризм в Республике Марий Эл» воткыл лаштык гыч налме.
