Марий Элыште кундем кӧргысӧ да ӧрдыжкӧ лектын коштмо туризм областьыште республик вуйлатышын грантшылан угыч конкурс увертаралтын.
Тушко йодмашым 11 май марте Спорт да туризм министерствыш пуаш лиеш. Электрон адресше тыгай: mari-tourism@mail.ru. Рашемдаш (8362) 23-27-94 телефон дене лиеш.
Грантым туризм дене кылдатше сомылым шуктышо казенный учрежденийлан огыл шотлалтше юридический лица, тыгак бюджет ден автоном учреждений (кудыштын учредительыштлан министерстве ок шотлалт), республикыште регистрироватлалтше посна предприниматель-влак налын кертыт. Но ик соискатель ик йодмашым гына пуэн кертеш.
Кум номинаций темалтеш: «Марий Элын турист куатшым вияҥдаш полшен кертше рекламно-информационный материал»; «Туризм сферыште деловой мероприятий (конференций, йыргешке ӱстел, форум)»; «Федерал туроператор, журналист, эксперт-влакым ӱжман информационный тур». Кажне номинацийыште сеҥыше-влаклан шонымаштым илышыш шыҥдараш 500 тӱжем теҥге гыч ойыралтеш.
С.Носова
