«Илыме вер да оласе кумдык» ден «Лӱдыкшыдымӧ сай качестван корно» нацпроект-влакым илышыш кузе пуртымым Россий Федерацийыште региональный вияҥмаш правительственный комиссийын президиумжын заседанийыштыже иктешленыт. Заседанийым вице-премьер Марат Хуснуллин эртарен.
«Лӱдыкшыдымӧ сай качестван корно» национальный проектым илышыш шыҥдарыме шотышто Марий Эл эн сай лу регион коклашке пура. 2024 ийыште регион кӱкшытан да верысе 268 километр корным шотыш кондымо.
«Илыме вер да оласе кумдык» нацпроект дене келшышын, республикыште икмыняр инженер инфраструктур объектым чоҥымо, тӱшкан пайдаланыме кумдыклам тӱзатыме, еҥ-влакым аварийный илыме верла гыч кусарыме, йӱмӧ вӱдын качествыжым саемдыме.
«Илыме вер» федеральный проект почеш тений 11 тылзе жапыште 409,6 тӱжем квадрат метр илыме верым эксплуатацийыш колтымо.
Шушаш ийыште элыштына «Илышлан кӱлшӧ инфраструктур» у национальный проект илышыш пурталташ тӱҥалеш. Марат Хуснуллинын палемдымыж почеш, эн кугу тӱткыш коммунал инфраструктурлан, общественный транспортым уэмдымылан да тӱрыс налмаште кумдыкым комплексно вияҥдымылан ойыралтеш.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
