УВЕР ЙОГЫН

Лӱддымӧ ден чулым-влаклан пӧлеклалтын

Кодшо кугарнян Йошкар-Олаште Э.Сапаев лӱмеш кугыжаныш опер да балет театрыште Российын гражданский обороныжлан 85 ий теммылан пӧлеклалтше мероприятийыш погынышо утарыше, пожарный, гражданский обороно пашам шуктышо да службын ветеранже-влакым Марий Эл правительстве председательын икымше алмаштышыже Сергей Сметанин саламлен. 

Марий Элым вуйлатыше Александр Евстифеевын лӱмжӧ дене нунылан пеҥгыде тазалыкым, пиалым да поро пашаштышт сеҥымашым тыланен. Палемден: пытартыш ийлаште гражданский обороно управлений ден вий ик гана веле огыл шке пайдалыкыштым ончыктеныт, пӱртӱс да техногенный туткар деч еҥ-влакым, материальный ден культур поянлыкым аралыме пашам ӱшанлын шуктеныт.

С.Сметанин Марий Элым вуйлатыше А.Евстифеевын лӱмжӧ дене службышто поснак ойыртемалтше пашаеҥ-влаклан наградым кучыктен. Шке пашам чаплын шуктымыштлан да  Марий Элын гражданский обороныжым пеҥгыдемдымашке надырым пыштымыштлан Звенигово ден Морко муниципальный районласе  гражданский оборонын надзор да профилактике паша отделжын начальникше Алексей Ермолаевлан, Волжск олан да Волжский муниципальный районын  тыгаяк отделжын начальникше Марат Сибгатуллинлан Марий Эл вуйлатышын Таумутшым увертарыме.

Российын гражданский обороныжлан 85 ий теммым 4 октябрьыште палемдат.

А.АНДРЕЕВ.

Опубликовать в Одноклассники

Добавить комментарий