«Женщины-мари в огне Великой Отечественной войны» фотоальманах савыкталт лектын.
Кугу Отечетвенный сарын корныжым мемнан республик гыч 2000 наре ӱдырамаш эртен. Шке лӱддымылыкыштым, чытышыштым нуно тылыште веле огыл, сӧй пасулаштат ончыктеныт. Нунын коклаште марий ӱдырамаш-влакат шагалын огыл лийыныт. У савыктыш дене «Саскавий» марий ӱдырамаш ушемын вуйлатышыже Людмила Кошкина палдарен.
Фотоальманахыште 24 марий ӱдырамаш нерген ойлалтеш. Нунын коклаште Волжский район гыч зенитчице А.Д Кошкина нергенат материал уло. Тудо 1943 ий гыч 1945 ий марте Ригыште служитлен. Тудын уныкаже шинчавӱд йӧре коважын илыш корныж нерген каласкален. Анастасия Дмитриевна, юмылан тау, эше ила, но 98 ийыш шушо шоҥгыеҥлан сурт гыч лектын кошташ куштылгыжак огыл.
Советский район гыч Анастасия Семеновна Лебедеват противоздушный оборонын войскаштыже служитлен. Ленинград фронтышто лийын, олан кевчывалвел рубежыштыже кавам арален, лач тушто Ладога ер гоч «илыш корно» каен. А тудын дене немыч войскан авырен налме Ленинградыш кочкышым, моло грузым шупшыктеныт, еҥ-влакым эвакуироватленыт. Марий ӱдырамаш йолташ ӱдыржӧ-влак дене пырля немыч авиаудар-влакым кораҥден толын. Тудо шуко медаль дене палемдалтын гынат, эн шергылан шкеже «За оборону Ленинграда» медальым шотлен. Тидын нерген ӱдыржӧ, республикысе тӱвыра, савыктыш да калык паша шотышто министрын алмаштышыже Галина Ширяева каласкален…
Моло ӱдырамаш-влак нергенат республикысе тӱвыра, образований, мер пашаеҥ-влак палдареныт. Фотоальманахым савыктен лукмо пашалан шийвундо дене Российысе марий-влакын федеральный калыкле да тӱвыра автономийышт, Калык-влакын пашашт шотышто федеральный агентстве полшеныт.
С.Носова
