6 июньышто Марий Элын Кугыжаныш Погынжо ден Марий кугыжаныш университетын юридический факультетше Марий АССР-Марий Эл Республик кугыжаныш кучемын законодательный органжылан 85 ий теммылан пӧлеклалтше «Публичный кучемын конституционный реформыжо: теорий да практике» всероссийский науко да практике конференцийым эртареныт.
Конференцийыште Кугыжаныш Погынын депутатше-влак деч посна Марий Эл правительствын членже-шамыч, сенатор Сергей Мартынов, элнан тӱрлӧ регионжо гыч толшо шанчызе-влак да самырык-шамыч участвоватленыт.
Марий Элым вуйлатыше Юрий Зайцевын саламлымашыжым правительстве председательын икымше алмаштышыже Евгений Кузьмин лудын пуэн: «85 ий жапыште регионысо законотворчествыш негыз ден йӱлам пыштыме, республиклан пеҥгыдын вияҥаш йӧным ыштыше шагал огыл законым приниматлыме. Таче Кугыжаныш Погын республикнан вияҥмаштыже да пеҥгыдеммаштыже кугу верым налеш, кӱкшӧ профессионализмын, политике велым торашке ужын моштымын да кугыжаныш ответственностьын примерыштым ончыкта. Республикна вияҥже, жап дене тӧр ошкылжо манын, законотворчествыште да сайлымашлаште участвоватлаш, политикым палаш кӱлеш. Тыгай шотан науко конференций шанчызе ден практик-шамычлан у идей-влакым муаш йӧным ышта шонем».
Пленар заседанийыште тӱҥ докладым Кугыжаныш Погынын председательже Анатолий Смирнов ыштен. Тудо 1938 ий 26 июльышто тӱҥалтышым налше парламентаризмын вияҥмыж нерген каласкален. Тунамсе МАССР-ын Верховный Советше ден кызытсе Кугыжаныш Погын кугу да куштылгыжак корным эртеныт. Неле тат-шамычат лийыныт – чылажат депутат-влакын гражданский лӱддымылыкышт да ответственностьышт дене кылдалтын. Но нуно чыла тергымашым чап дене эртеныт.
Пленар заседаний деч вара «Публичный кучемын единый системыштыже вашкылым ыштыме конституционно-правовой аспект-шамыч» да «Самырык тукымын Российын конституционно-правовой векторжым ужмыжо: национальный идей, у модель да ончыкылыкын проекцийже-влак» темыла дене секций-шамыч пашам ыштеныт. Икымшыже дискуссий форматыште эртен гын, кокымшыштыжо йыргешке ӱстел йыр шинчын мутланеныт.
Тачысе кечылан пӱсын шогышо йодыш-влак шотышто шке шонымашыштым министерстве ден ведомство пашаеҥ, аспирант, студент-шамыч, вуз-влакын преподавательышт ойленыт. Нуно образований сферыште публичный виктемын цифровизацийже, кугыжаныш-частный да муниципальный-частный партнёрство, нормативный правовой акт-влакын антикоррупционный экспертизышт, ялысе молодёжьын ончыкылыкшо, мер эскерымашым организоватлыме шотышто темлымаш дене кылдалтше йодышлам тарватеныт.
М.ИВАНОВА
Фотом Марий Эл Кугыжаныш Погынын сайтше гыч налме
