13 сентябрьыште Марий Элым вуйлатышын пашажым жаплан шуктышо Юрий Зайцев Марий целлюлоз-кагаз комбинатын пашаеҥже ден ветеранже-влакым предприятийым негызлыме кечылан 88 ий темме да Чодыра да чодырам перерабатыватлыме промышленность пашаеҥ-влакын лишемше кечышт дене саламлен.
«МЦБК» АО ынде ятыр ий Волжскысо промышленностьын флагманжылан шотлалтеш. Ӱмаште гына 13 миллиард утла теҥгеаш продукцийым ямдылен луктын. Предприятий нигунамат верыште огеш шого, чарныде вияҥеш: производствышто капитально олмыктымо пашам шукта, оборудованийым уэмда, пашаеҥ-шамычлан сай йӧным ышта. Ӱмаште гына комбинатын материально-технический базыжым вияҥдашлан 1,5 миллиард утла теҥгем колтымо», – палемден Ю.Зайцев.
Республикым вуйлатышын пашажым жаплан шуктышо предприятийын олан социальный инфраструктуржым вияҥдымашке пыштыме надыржым палемден. Комбинатын оксаж кӱшеш Тӱвыра пӧрт, спортзал, «Марбум Арена» комплекс, йӱштылмӧ бассейн, Яльчик ер серыште здравнице пашам ыштат. Кызыт тазалыкым пеҥгыдемдыме комплексын кумдыкыштыжо бассейным чоҥат.
«Предприятийыште 2200 еҥ тырша. Нунылан Марбумкомбинат – пеҥгыде эҥертыш да ӱшан. Кугу дате-влак лишемме вашеш мый комбинатын ветеранже, пашаеҥже да вуйлатышыже-шамычлан пашалан ӱшанле улмыштлан, шкем чаманыде тыршымыштлан, олан, тыгак регионын промышленностьыштым вияҥдымашке надырым пыштымыштлан тауштем. Мый тыланда тазалыкым, пиалым, куштылго огыл, но моткоч кӱлешан пашаште сеҥымашым тыланем. Пайрем дене!» – залыш погынышо-влакым саламлен Ю.Зайцев да награде-шамычым кучыктен.
Марий Эл Республик правительствын Чап грамотыж дене автоозанлыкын автомобиль водительже Андрей Киляшов, 3-шо №-ан цехын начальникше Олег Сажин да генеральный директорын чодырам ситарыме да пу сырьём переработатлыме шотышто алмаштышыже Валерий Краснов палемдалтыныт.
Марий Эл Республикым вуйлатышын Таумутшым 3-шо №-ан цехын упаковатлыше машинан машинистше Валентина Волостновалан, транспорт цехын груз ден багажын приемсдатчикше Елена Шикиналан, 1-ше №-ан цехын кугурак инженер-технологшо Алексей Сухановлан, пашам аралыме, граждан обороно да чрезвычайный ситуаций шотышто тӱҥ инженерын алмаштышыже Сергей Шамсеевлан, ТЭЦ-ын тӱҥ инженерже Дмитрий Киселевлан, тӱҥ бухгалтер Татьяна Коробковалан кучыктымо.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
