Марий Эл вуйлатыше Юрий Зайцевын эртарыме совещанийыште Йошкар-Оласе кудывечылам тӱзатыме да тротуар-влакым олмыктымо, ты пашам шушаш ийыштат умбакыже шуйымо нерген каҥашеныт.
Мэрын мутшо почеш, тений кеҥеж мучко 15 кумдыкышто чылаже 5,2 километр кутыш корным тӧрлымӧ, тыге шуко пачашан 42 пӧрт да 11 социальный учреждений дек кудал мийыме корно саемын. Прохоров, Строитель-влак, Йыван Кырля да Бауман уремла кӧргысӧ кудывечыште паша кузе кайыме нерген Евгений Маслов посна радамлен каласкален, молан манаш гын ты объектым республик вуйлатыше шкежак тергымаште кучен.
«Кудывечылаште ончыч шарыме асфальт шартыш йӧршынат шаланыл пытен, тротуар дене южо вере ошкылашат огеш лий, вет лу ий дене олмыктымо огыл. Тыгай пашам шукташ пытартыш 5 ий жапыште 145 миллион теҥгем кучылтмо. Тений гыч сӱрет шинчалан койшын вашталтын. Тендан, Юрий Викторович, да республике правительствын полышыштлан кӧра 120 миллион теҥге ойыралтын. Ола администраций тыгак 60 миллионым ешарен», – каласен Евгений Маслов.
Ешарен, Марий Эл вуйлатышын кӱштымыж почеш кудывече-влакым терген лекмек, инвентаризацийым ыштыме, тудын негызеш 2023-2027 ийлаште шуко пачашан пӧрт-влак кокласе кварталлаште да кудывечылаште олмыктымо пашам шуктышаш программым пеҥгыдемдыме. Тӧрлышаш кудывечым ойырымо годым социальный учреждений-влакын вераҥмышт, ты кумдыкышто мыняр еҥ илыме, кудывече кӧргысӧ корнын да тротуар-влакын могайрак улмышт шотыш налалтыт.
Совещанийыште тыгак Йошкар-Олаште тӱшкан пайдаланыме корно нергенат йодыш тарванен. Ола администраций вуйлатышын мутшо почеш, ГОСТ-ын йодмыж почеш автомашина-влак кудалыштме 2,2 млн.кв.метр кумдыкым да 600 тӱжем кв.метр тротуарым кӱлеш семын кучаш идалыкыште миллиард теҥге утла окса кӱлеш. А кызыт ты пашалан ик ийлан 200 миллион теҥге ойыралтеш», – рашемден мэр.
Марий Эл вуйлатыше ешартыш оксам ойырымо йодышым рашемдаш кӱштен, кудывече-влакым шушаш ийыштат олмыкташ тӱҥалыт манын ӱшандарен каласен.
Марий Эл Республикым вуйлатышын организаций да аналитике виктемжын уверже почеш Л.СЕМЕНОВА ямдылен
