Ик тылзе гыч «Лесная сказка» эмлыме да тазалыкым пеҥгыдемдыме комплексыште кеҥеж смене тӱҥалеш, Марий Элым вуйлатыше Юрий Зайцев дене вашлиймыж годым регионын образований да науко министрже Лариса Ревуцкая палемден.
Таче кечылан эмлыме да тазалыкым пеҥгыдемдыме тӧнежын чыла парымжым петырыме, погым арест гыч кораҥдыме, а эше кочмыверын, медпунктын да 60 веран корпусын леведышыштым олмыктымо. Кызыт пищеблокым, йоча-влакын тазалыкыштым пеҥгыдемдыме корпусым, кочмыверым, уремысе сценым ачалат, светильникым вашталтылыт, йӱштылмӧ верым тӱзатат, саварым шогалтат.
«Йоча-шамычлан кеҥежым канаш келшыше чыла йӧным май мучаш марте ыштен шуктыман. Лагерьын тений угыч пашам ышташ тӱҥалмыже куандара. «Лесная сказка» да ола деч ӧрдыжтӧ верланыше моло лагерьын чыла помещенийышт ден кумдыкышт лӱдыкшыдымӧ да санитарный нормо-влаклан келшен толшо лийшаш улыт», – каласен Ю.Зайцев.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
