25 апрельыште Марий Элым вуйлатыше Юрий Зайцевын кӱштымыж почеш, республик правительстве председательын икымше алмаштышыже Евгений Кузьмин школлаште тунемше да студент-влаклан Йошкар-Ола мучко экскурсийым эртарен.
Тиде мероприятий «Прогулка со Знанием» Россий кӱкшытан акций кышкарыште лийын да «Шинчымаш. Икымше-влак» просветитель марафонлан пӧлеклалтын.
Экскурсий годым Евгений Кузьмин самырык еҥ-шамычлан рӱдолан шочмыжо, вияҥмыже, Йошкар-Олан ик эн кумдан палыме еҥже-влак да нунын сеҥымашышт нерген каласкален. Нуно пырля Чарла кремльыште, Изи Какшан серыште лийыныт. Тыге самырык еҥ-влак шуко объект нерген оҥайым да кӱлешаным пален налыныт. Правительстве председательын икымше алмаштышыже палемден: Чарла кремль 2009 ийыште чоҥалтын, тудын олмышто кокла курымышто Чарла ор лийын, варажым – Пазар площадь, эше варарак – Революций площадь. Чарла кремльым чоҥымо деч ончыч тыште археолог-влак обороно сооруженийла – кужу канаве ден вал – деч кодшым муыныт, нуныжо XVII курымышто чоҥалтыныт улмаш.
«Шинчымаш» Россий обществын регионысо координаторжо, Марий кугыжаныш университетын руш йылме, литератур да журналистке кафедрын доцентше Сергей Журавлёв оҥай экскурсийым эртарымыжлан Евгений Кузьминлан тауштен ойлен.
Палемдыман, тиде акций элнан чыла субъектыштыже эрта.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
