Кодшо арнян Марий Эл вуйлатыше Юрий Зайцев Россий Федерацийыште регион-влак вияҥме шотышто правительственный комиссийын президиумжын (штабын) эртарыме заседанийын пашашкыже ушнен. Заседанийым Россий правительстве председательын алмаштышыже Марат Хуснуллин вӱден.
Каҥашыме йодыш-влак кокла гыч иктыже – «Юлым тазаҥдымаш» федерал проектым илышыш шыҥдарымаш.
Йошкар-Олаште канализацийым эрыктыше сооружений-влакым пужен ыштат. Производительность суткаште 60,8 тӱжем кубометрыш шуэш. Кызыт чумыр пашан I этапше кая. Тудым ончылгоч, 2023 ийыште, шукташ палемдыме. Реконструкций Изи Какшаныш йоген пурышо вӱдын качествыжым ятырлан саемдаш полша. Пашан акше 1 миллиардат 580 миллион теҥге нарыш шуэш.
Объектыште паша палемдыме график деч ончыч шукталтеш, 95 проентлан ямде. Икымше линийым пӱтынек пужен чоҥымо, кызыт кумдыкым тӱзатат да оборудованийым шындылыт.
Заседанийыште тыгак «Илыме вер» федерал, «Сай качестван лӱдыкшыдымӧ корно» национальный проект-влакым каҥашеныт. Марий Элыше корным ыштыме да олмыктымо паша графикым ончылтен ышталтеш. 2023 ийыште БКД напроект кышкарыште палемдыме мероприятий-влакым шукташ ончылтымо финансирований йӧн дене 1 миллиардат 863 миллион теҥге ойыралтын.
Тачысе кечын Йошкар-Оласе корным ончалаш гын, 4 объектым, чумыржо 2,9 км кутыш, эксплуатацийыш колтымо. Регион значениян 17 объект гыч (100 км наре) 2 объектшым (16,5 км) ыштен шуктымо. График деч почеш кодмаш уке, чылажат план почеш кая.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
