Спорт туризм
Мӱндыр кундем гыч – сеҥымаш дене
20 гыч 26 август марте Байкал ер воктене спорт туризм дене Российын чемпионатше эртен. Тушто кумда элнан ятыр регионжо гыч турист-шамыч таҥасеныт. Регионна гычат команде ушнен, сеҥыше да призёр радамыш логалын.
Мутлан, икымше кечынак, 21 августышто, участник-шамыч мужыр дене таҥасымаште вийыштым тергеныт. Ты стартыште Марий Эл гыч Вячеслав Демьянов ден Георгий Дмитриев, ӱдырамаш-влак коклаште Ксения Мубаракшина ден Маргарита Черникова икымше верым налыныт.
– У полигон кажне участниклан уак лийын, тӱрлӧ неле чарак дене келыштаралтын да курыкат нояш ситышынак вашлиялтын. Мыланемат, опытан спортсменлан, нелырак ыле, финиш марте шкешотан напряженийыште лийынна. Тау, самырык-шамыч виян алмаштыше, мастар кушкыт, поктат, жапымат эскерат. Таче чемпион улына, а эрла – адакат вес старт. Тыге адакат тале, мастар да писе улмынам ончыктыман, – палемден икымше таҥасымаш деч вара 28 гана Российын чемпионжо К.Мубаракшина.
Ты чемпионатын эше ик стартыште, ориентирований дене келыштаралтше кужу кужытышто регионна гыч сборный команде «шӧртняҥын». Сборныйышто Рустам Урдяков, Михаил Тарасов, Вячеслав Демьянов, Георгий Дмитриев лийыныт. А ӱдырамаш команде кумшо верыш лектын. Тушто Ксения Мубаракшина, Алина Горбачева, Екатерина Николаева, Маргарита Черникова ойыртемалтыныт.
Спортсменна-влакым шокшын саламлена.
Е.Эшкинина.
