Герой-влак огыт коло
5 сентябрьыште Волжский районысо кум школышто Украиныште спецоперацийыште геройла колышо-влаклан шарнымаш оҥам почыныт.
Эн ончыч – Кугу Корамас кыдалаш школышто Сергей Евгеньевич Тимоевлан, варажым Шарача кыдалаш школышто Александр Сергеевич Ивановлан, а кумшыжо – Памар общеобразовательный учрежденийыште Никита Викторович Кокшагинлан.
Тыге кум школ пырдыжеш шарнымаш-мемориал оҥам пижыктеныт. Торжественный митингым почмаште Российысе марий-влакын федерал калыкле-тӱвыра автономийыштым вуйлатыше Лариса Яковлева, Марий Элын пӱртӱс поянлык ресурс, экологий да йырым-йырысе средам аралыме министржын алмаштышыже Ирина Шашкова, районысо военный комиссариат гыч отдел начальник Вячеслав Кривошеев, Волжский район администраций вуйлатыше Татьяна Ильина, Волжский район вуйлатыше Владимир Сергеев, верысе администраций вуйлатыше да молат лийыныт.
Шарнымаш оҥа мемнан тыныс, ончыкылык волгыдо илыш верч вуйым пыштыше-влакым да пӱтынь калыкын ойгыж нерген шарныкташ тӱҥалеш. Ончыкылык тукымлан пример лийыт. Герой-влак огыт коло, ӱмырешлан шарнымашеш кодыт.
А ты школлаште шарнымаш оҥам почаш полшышо-влаклан, верласе школ администрацийлан, туныктышо коллективлан пеш кугу тау.
Лишыл еҥым йомдарыме нерген ойлаш эреак неле. А кунам илыш гыч чылт самырык-шамыч каят, эшеат йӧсӧ.
Никита Кокшагин 2001 ий 8 июньышто Пӧртанур ялыште шочын. Памар кыдалаш школым 2017 ийыште тунем лектын. СПК-аште сварщиклан тунемме деч вара контракт почеш Таджикистаныште служитлен. Весела, сай рвезе лийын. Футбол да хоккей дене модаш йӧратен.
Коло ияш Никитан подвигше тунемше-влаклан нравственный урок семын лиеш. Спецоперацийыште шке воинский долгшым лӱдде шуктымыжлан колымыж деч вара Мужество орден дене наградитленыт.
Александр Иванов Отымбал ялеш 1998 ий 12 сентябрьыште шочын. Шарача кыдалаш школын выпускникше. Рвезе сайын тунемын, спорт дене пеҥгыде кылым кучен, а кандашымше класс деч вара Йошкар-Оласе политехнический лицей-интернатыште шинчымашым поген. 2009 ийыште Озаҥ оласе танковый училищыш тунемаш пурен. 2022 ий 16 мартыште спецоперацийыште ӱмыр лугыч лийын.
Колымыж деч вара Александрым Мужество орден дене палемденыт.
Полатэҥер ял гыч Сергей Тимоев нерген поснак палемден кодымо шуэш. Кугу Корамас школышто индеш классым тунем лекмек, Пӧтъял тунемме рӱдерыште электрогазосварщик специальностьым налын. 2010-2011 ийлаште Оренбург область Тоцкое-2 частьыште срочный службым эртен. Отделенийын командирже лийын. Сочиште теле Олимпиадылан стадионым чоҥымаштат тыршен. Изинек военный лияш шонен. Спорт дене кылым кучен, шуко тренироватлалтын. Пеҥгыде капкылан, чытышан улмыжлан кӧра 2013 ийыште Озаҥ оласе спецназын 26-шо отрядышкыже пашаш пурен. Кугу конкурсым эртен, «Краповый беретын» озаже лийын. 2016 ий гыч контракт почеш Таджикистаныште служитлен. Ветеран-влакын «Боевое братство» всероссийский мер организацийыштыжат шоген. Тудым чылан пагаленыт. Рвезе чыла шотыштат ӱшанле айдеме лийын. Колымыж деч вара Мужество орден дене палемденыт.
Тений Кугу Корамас школышто 74 квадрат метр кумдыкан кабинетым гимнастический заллан келыштареныт. Тушто ӱдыр-рвезе-влаклан заниматлалташышт Сергей Тимоевын аваже Зинаида Аркадьевна ден ачаже Евгений Петрович келшыше спорт инвентарьым налыныт. Кызыт ты кабинетлан Сергей Тимоевын лӱмжым пуымо. Гимнастический спорт залым 1 сентябрьыште торжественно почыныт.
Мемнан пиалан, тыныс илышыште пашам ыштен илымына верч Украиныште спецоперцийыште вуйыштым пыштыше-влакым порын шарнена, а нунын ача-аваштын ончылно вуйнам савена.
Е.Эшкинина.
