Йошкар-Оласе 24-ше №-ан школышто «Ратник-2017» республиканский военно-спортивный слёт эртен.
Тудо самырык-влакын чонышкышт шочмо элым йӧратыме шӱлышым шыҥдараш, таза илыш йӱлам кучаш, военно-прикладной спортын видше-влаклан шӱмаҥдаш да военный службым эрташ кумылаҥдаш шонымаш дене эртаралтын. Слётышто кадет классан Йошкар-Оласе школла гыч, тыгак ракетный дивизийысе военнослужаший команде-влак лийыныт. 24-ше школыштыжо МЧС-ын кадетше-влак тунемыт.
Таҥасымаш годым участник-влак автоматын макетшым пужен погеныт, медицине шинчымашым, физический ямдылалтмашым, строй дене коштын моштымым ончыктеныт, общевойсковой аралалтме комплектым чиеныт.
Жюрин иктешлымашыже тыгай лийын: икымше верым МЧС-ын кадетше-влак налыныт. Тыште нунын тренерышт да туныктышышт Александ Тищенкон тыршымашыжым палемдыман. Кокымшо верыш 4-ше №-ан гимназийын да кумшыш 29-ше №-ан школын кадетше-влак лектыныт.
Чыла участник-влаклан жюри таза илыш-йӱлам пропагандироватлымылан, сай лектышым ончыктымылан да шочмо элнам аралаш ямде улмылан тауштен.
С.Носова.
Снимкыште: икымше верыш лекше команде.
