Чуваш Республикын Калык-влак келшымаш пӧртыштӧ Марий калыкын тӱвыра кечыже эртен.
Тений тудо Еш идалыклан пӧлеклалтын. Мероприятийым Чебоксар оласе «Марий калыкын землячествыже» калыкле-тӱвыра автономий чуваш Республикын Тӱвыра министерствыжын, «Российысе калык-влакын ассамблейышт» регионысо мер-кугыжаныш организацийын полшымышт дене эртарен.
Пайремым почмо годым Чуваш Республикын Кугыжаныш Советшын председательже, ассамблейым вуйлатыше Леонид Черкесов палемден: «Марий Эл – мемнан эн лишыл пошкудына, ме ваш келшен илымына дене моткоч кугешнена. Поро пошкудо улмо кыл мыланна моткоч шерге. Марий тӱвырам чуваш мландыште илыше марий-влак арален толыт. Нуно регионышто калыкле-тӱвыра автономийыш ушненыт. Ты организаций республикыштына ик эн чолган пашам ышта. Тек ты мероприятий Калык-влак келшымаш пӧрт пелен пашам ыштыше чыла калыкле-тӱвыра автономий-влак кокласе вашкылым эшеат чотрак пеҥгыдемдаш полша».
Тӱвыра кече дене саламлаш Марий Эл Кугыжаныш Погын председательын икымше алмаштышыже, Российысе марий-влакын калыкле-тӱвыра автономийыштым вуйлатыше Лариса Яковлева миен.
Ушештарен кодыман, Шупашкарыште марий-влакын мер организацийышт кодшо ийын сентябрьыште ышталтын. Тудым Александр Гурьянов вуйлата. Тиде жапыште автономий шкенжым чынжымак чолган ончыктен да республикысе моло калыкле-тӱвыра автономий-влак дене сай кылым ыштен.
Снимкыште: мероприятий годым
Фотом Калык-влак келшымаш пӧртын лаштыкше гыч налме.
