2 августышто Киров область Малмыж район Кугу Кетек ялыште Акпатыр чочойлан вуйым савен кумалмаш лиеш.
Акрет марий талешкылан пӧлеклалтше кумалтыш тыште кажне ийын авустын икымше шуматкечынже эртаралтеш. Тушко Марий Эл, тыгак Российысе регионлаште марий-влакын тӱшка илыме кундемлаж гыч онаеҥ-влак мият да тӱшкан пелештат.
Акпатыр – марий легендын персонажше, кугу уш-акылым погышо, калыклан эре каҥаш дене полшышо, виян эмлызе лийын. Пикшыже пурен кайыме верыш тудым тоеныт, маныт. Шӱгар ӱмбакыже куэм шынденыт. Тудым верысе-влак шнуй пушеҥгылан шотлаш тӱҥалыныт. 1998 ий 15 августышто ты верыш памятникым шогалтеныт. А тудын ӱмбалныже серыме: «Марийлан вий-куатым пуэн шого!»
Кажне ийын Акпатырын шӱгарышкыже вуйым саваш шуко еҥ коштеш. Туштак кушшо куэн укшлажым ончалынат тидым умылет, пеш шуко солык кеча. Кажне кумалтыш деч вара пайрем концерт, икте-весе деке унала коштмаш йӱлаш пуреныт.
Светлана Носован фотожор
