12 февральыште Медведево районысо Кугу Шап ялыште икымше гана республик кӱкшытан ойыртемалтше тер-влакын «Лийдымат лийын кертеш» конкурсышт эрта.
Тушко ушнаш йодмашым opuchka777@gmail.com электрон адресыш колтыман. Мероприятийым «Конек Горбунок» тоштер-фермын озаже-влак эртарат. Нуно оҥай программым ямдыленыт. Тержым тӱрлӧ темылан келыштараш да сылнештараш лиеш. Шке пашам посна еҥ, коллектив, еш денат ончыкташ лиеш. Жюри терым веле огыл, тудын конструкцийжым, кузе сӧрастарымым, экипировкыжым, тыгак шкем кузе палдарымымат, терын курык гыч куштылгын мунчалтен волымыжымат аклаш тӱҥалеш.
Номинаций-влак тыгай лийыт: «Эн сай презентаций», «Эн ойыртемалтше тер», «Эн кугу тер», «Эн писе тер». Сеҥышыш лекше-влакым шарнымашан пӧлек-влак вучат.
С.Носова
Снимкыште: тоштер-фермыште каныш кечын.
