Марий Эл гыч Иван Поспехов Юл кундем федерал округышто «Российын лидерже-влак» конкурсын «Кугыжаныш виктем» трекыштыже сеҥышыш лектын.
«Россий – йӧным пуышо эл» президент платформын флагман проектшын конкурсыштыжо Юл кундем федерал округын регионысо финалыштыже 35 сеҥышым палемдыме. Нунын кокла гыч иктыже – мемнан республик гыч Иван Поспехов.
Регионысо финал Нижний Новгородышто «Кугыжаныш виктем» да « Бизнес и промышленность» трек-влак дене мучашлалтын.
Чылаже мероприятийлаште Юл кундем федерал округын 14 регионжо гыч 354 финалист моштымашым ончыктен, тышеч 161 участникше «Кугыжаныш виктем» трекыште. Тудын 14 сеҥышыже гыч иктыже, Иван Поспехов, Йошкар-Олаште илыше предприниматель, частный юридический практиклан шотлалтеш. Тыгак тудо шочмо кундемжым шымлаш йӧрата, 2020 ийыште эсогыл Марий Элын рӱдолаштыже троллейбус транспортын историйже нерген оҥай шымлымашыжым савыктен луктын. Иван кундемыштына социализм жапысе автомобиль модель-влакын кугу коллекцийжын озаж семын палыме.
Конкурс шотышто тудо тыге каласен: «Маяковский манмыла, «единице – тиде ноль»: ик еҥ, эн кугу гынат, тыглай гына пырням тарватен огеш керт. Сандене еҥ-влак эреак умыленыт: нунын вийышт – ушнымаште. Лидер – кӱлешан шонымашым илышыш пурташ калыкым ушен моштышо айдеме. Шинчымашем, моштымашем шке кӱкшытыштӧ. Конкурслан кӧра Российысе вуйлатыше-влаклан мӧ кӱлеш – умыленам».
Г.Кожевникова
