17 февральыште Татарстанын Агрыз район Буймо селаштыже «Марий ечыгорно» спорт таҥасымаш лумшо гана эртен. Тушко районысо спортсмен-влак веле огыл, тыгак Казань, Набережные Челны олала, Удмуртий гычат чумыргеныт. Чылаже 250 еҥ вийжым терген.
«Марий ечыгорныш» мийыше-влакым Агрыз район вуйлатышын алмаштышыже Р.Нурисламов саламлен. Краснобор эмлымверын тӱҥ врачше В.Кибатов спецпризым Буймо школын ончычсо директоржо Р.Дмитриевлан таза илыш-йӱлам кучымыжлан кучыктен.
Таҥасымаш школыш коштдымо икшыве-влакын гонкышт гыч тӱҥалын. Вара вуйлатыше-влаклан VIP таҥасымашышт эртен. Тушто Удмуртий гыч Л.Еманова сеҥен. Еш эстафетыште Агрыз ола гыч Семёновмыт икымше верым налыныт.
Ял шотан илем-влак коклаште эртаралтше районысо спартакиаде кышкарыште варналтше эстафете лийын. Сеҥышыш Пелемеш ялын командыже лектын. А «Марий ечыгорно» таҥасымаште ойыртемалтше-шамычлан медальым, грамотым, пӧлекым кучыктеныт. Чылаже 60 сеҥыше ден призёрым палемденыт. Вес ийын спорт пайрем Кадрек селаште лиеш.
А 24 февральыште Буймо кыдалаш школышто волейбол дене модмаш эрта. Турнир Буймо ял шотан илем вуйлатышын призше верч лиеш. Таҥасымашке марий-влак веле ушнен кертыт. Лекше йодышым 89600893507(Эдуард Михайлов) але 89534923321 (Максим Макаров) телефон номерла дене рашемдыман.
Л.МИХАЙЛОВА.
Авторын фотожо.
