Шефствыш налме районышто илыше калык марий медик-влаклан таушта.
Медведево районысо рӱдӧ больницын Краснооктябрьский врачебный амбулаторийжын врач-терапевтше Дмитрий Лебедев ден Параньга районысо рӱдӧ больницын фельдшерже Жанна Даутова Запорожский областьысе Куйбышев районышто 13 май гыч пашам ыштат.
– Тиде жапыште мемнан деке 72 еҥ медицине полышым йодын толын, – каласкала Д.Лебедев (снимкыште). – Ме профосмотрым эртарена, пӱсӧ да пӱсемше хронический чер дене орланыше кугыеҥ-влакым приниматлена. Инвалидностьым налшашлан медико-социальный экспертизылан документым ямдылаш полшена. Лу еҥын гипергликемий, кок пациентын гиперхолестеринемий, эше кок еҥын шинча кӧргысӧ давлений дене орланымыштым рашемденна. Верысе калык поро кумылан. Поснак кодшо командировко годым эмлыме пациент-влакым ужаш куанле, нуно мемнан деке лӱмынак таушташ толыт – темлыме йӧнна-шамыч черышт деч паремаш полшеныт.
Д.Лебедев ден Ж.Даутова Запорожский областьыш кумшо гана каеныт, Куйбышев районысо медик-шамыч дене пырля калыклан 11 июнь марте медосмотрым эртарат.
М.ИВАНОВА
М.Иванован фотожо
