Сессий
Кӱлешан ойым темлат
«Мариэнергон» специалистше-влак республик кӱкшытан «Самырык-влакын олашт» стратегий сессийыш ушненыт.
Тиде сессий Россий Федерацийысе регионлаште самырык-влак дене кылдалтше политикым комплексно вияҥдыме «Самырык-влаклан регион» программым, тыгак «Самырык да йоча-влак» нацпроектым илышыш пуртен толмашке виктаралтын. Тудо Йошкар-Оласе тӱрлӧ учреждений ден предприятийын, тидын шотыштак «Мариэнерго» филиалын, пашаеҥыштым, 80 утла самырык специалистым, чумырен.
Тушко погынышо-влак Йошкар-Олаште Пашам ыштыше самырык-влаклан рӱдерым проектироватлыме дене кылдалтше йодышым каҥашеныт. Нунылан маршрутым да кумыл йодмылан келшыше кумдыклам планироватлымылан посна тӱткыш ойыралтын. Рӱдерын тематике почеш блоклажым да, бюджетын изи улмыжым шотыш налын, тӱҥ корнылажым радамлыме.
Стратегий сессийын итогшо почеш инженерный системе шотышто йодмашан, архитектор, чоҥышо да пашам виктарыше-влаклан темлымашан проект документым ямдылыме. Тидыже самырык-влакын ончыкылык рӱдерыштын негызышкыже савырна.
«Мариэнергон» специалистше-влак шке филиалыштын самырык-влак дене кылдалтше политикышкышт чулымын ушнат да республике кӱкшытан сессий ден форумлаште кӱлешан ойым темлат. Самырык-влакын ушемыштын сай тӱҥалтышым ончыктымышт республикнам илышлан да пашалан йӧнаным ышташ, практике опытан самырык специалист-влак резервым ямдылаш полша», – каласен «Рӱдӧ да Юл кундем Россеть» ПАО-н «Мариэнерго» филиалжын директоржо Сергей Хлусов.
Юрий ИСАКОВ.
Снимкыште: стратегий сессий вуйым пудыраташ таратен.
Фотом «Мариэнергон» пресс-службыж деч налме.




