УВЕР ЙОГЫН

Ялозанлык технике да кушкылым аралыме средстве-влакым Йошкар-Олаште ончыктеныт

 

Теҥгече «МарийУралТракСервис» ООО-н технике комплектаций базыштыже ялозанлык технике да кушкылым аралыме средстве-влак дене палдарыше ончер эртен. Тудо тений луымшо гана лийын да агропромышленный комплексым шошо ага тургымым эртарен колташ   ямдылымылан пӧлеклалтын. 

Семинарыш ялозанлык паша дене кылдалтше федеральный да республиканский организаций, районласе ялозанлык управлений, муниципальный администраций вуйлатыше, Марий Элын Ялозанлык да продовольствий министерствыжын специалистше-влак погыненыт. Тыгак Гостехнадзорын инспекторжо, ялозанлык техникым, шапаш ужашым да кушкылым аралыме средствам темлыше поставщик, кредит учрежденийлан еҥже-влак лийыныт.

Ончер-семинарым Марий Элын ялозанлык да продовольствий министрже Александр Гречихо почын. Погынышо-влакым «МариУралТракСервис» ООО-н  директоржо Александр Собко саламлен.  

Ончер эртыме жапыште шошо ага, тудым эртарен колтымо дене кылдалтше шуко пӱсӧ йодышым тарватеныт. Мутлан, республикын машина-трактор паркшын могай улмыжо, тудым уэмден толмо шотышто мо ышталтме, мом ышташ кӱлмӧ нерген ялозанлык  да продовольствий министрын алмаштышыже Андрей Кондратенко палдарен.

Ялозанлык техникым да шапаш ужашым ыштен лукшо предприятий-влакын еҥыштын выступленийышт семинарыш толшо-влаклан поснак пайдале лийын. Мутлан, «Брянсксельмаш» ЗАО-н генеральный директоржо Валерий Сулеев шкеныштын паша опытышт, тыгак пырчым погышо да кормам ямдылаш кучылтмо «Десна-Полесье» шке коштшо технике нерген каласкален. «Лидагропроммаш» ОАО-н директоржо Виталий Якубчик «Лида» пырчым погышо комбайн дене палдарен. Тыгак шурным коштымо комплекс-влак, тӱшка озанлыклаште ашныме вольыкым пукшымо пашам куштылемдыше у технике денат палыме лияш йӧн лийын. Ончерыште кугу куатан МТЗ тракторат шоген.

Семинарыште ойлышо  кажне гаяк специалист пасу пашам шуктымо годым утларак ресурсым аныклыше техникым кучылташ кӱлмӧ нерген темлымашым ыштен. Шарнымашеш кодо Беларуссийысе «Гомсельмаш» ОАО-н директоржын алмаштышыже Вадим Леоновын ойлымыжо.

Каласен кодыман: ялозанлык техникым да нунылан шапаш ужашым ыштен лукшо Российысе веле огыл, йот элласе предприятий-влакын вуйлатышышт шкештак ты семинарыш толыныт ыле. Сандене тушто мемнан ялозанлык специалист-влаклан шуко уым ужаш, ончыл предприятий-влакын паша опытышт дене палыме лияш сай йӧн лийын.

С.Носова.
Д.Речкинын фотожо.

Опубликовать в Одноклассники

Добавить комментарий