Чоҥымо, да эше чоҥалтыт

Марий Элыште шым тылзе жапыште капитально чоҥымо 12 объект пашам ышташ тӱҥалын.
Нунын коклаште – Яков Эшпай лӱмеш марий кугыжаныш филармоний, Медведево посёлкысо йочасад, куд ФАП, вертолёт площадке, кок стадион-площадке, Медведево районысо илемлаште вӱдым ситарыме системым шергашлымаш.
Тений чылаже 21 объектым пашаш колташ палемдыме, Марий Элым вуйлатыше Александр Евстифеевын правительство член-влак дене национальный проект-шамычым илышыш пуртымо йодыш дене эртарыме совещанийыште палемден регионын промышленность, экономически вияҥмаш да торговльо министрже Станислав Крылов.
Минэкономразвитийын увертарымыж почеш, 20 август марте 823 контрактым ыштыме. Тиде чот обязательствын чумыр кугытшо гыч – 92,1 процент. Эше 18 контрактым ышташ кодын.
Национальный проект-влак кышкарыште федеральный бюджетын средстважым кассе гоч колтымо шотышто шым тылзаш иктешлымашым финанс министрын алмаштышыже Татьяна Шумахер ыштен. Ойлымыж почеш, 2021 ийыште национальный проект-шамычым илышыш пурташлан республикын бюджетыштыже 9,8 млрд. теҥгем кучылташ палемдыме, ты шотышто 6,3 млрд. теҥгем – федеральный бюджетын средстваж кӱшеш, 3,5 млрд. теҥгем – республикын бюджетше гыч.
«Куд миллиард теҥге финансирований лийын, тиде пеҥгыдемдыме идалыкаш назначений гыч 61,4 процент ужаш, ты шотыштак федеральный бюджетын средстваж кӱшеш 3,65 милиард теҥгем кучылтмо», – палемден Татьян Шумахер.
Совещанийыште «Демографий», «Здравоохранений, «Образований», «Илыме вер да оласе кумдык» да моло национальный проект нерген радамын кутырымо.
Тыге, Калык илышым вияҥдыме шотышто министерствын уверже почеш, «Йоча шочмо годым еш-влаклан финанс полыш» федеральный проект кышкарыште Марий Элыште икымше йочалан выплатым 6 тӱжем утла еш налаш тӱҥалын. Регионысо проектым илышыш пурташлан 2021 ийыште чылаже 1,3 млрд. теҥгем кучылташ палемдыме.
Республикыште «Кугурак тукым» федеральный проектат пашам ышта. Калык илышым вияҥдыме шотышто министр Марина Островскаян каласкалымыж гыч, кугурак тукымым социально обслуживатлыме стационар организацийлаште материально-технический базым пеҥгыдемдыме паша шукталтеш, илалше граждан-шамычын диспансеризацийыштлан кугу тӱткыш ойыралтеш.
Тазалыкым аралыме министр Марина Панькован докладше дене келшышын, «Здравоохранений» наиональный проектын регионысо проектше-шамычым илышыш пурташлан 2021 ийыште финансированийын чыла источникше кӱшеш 1,5 млрд. теҥгем кучылташ палемдыме.
Сентябрьыште шӱм-вӱргорно чер дене орланыше пациент-влаклан 1,4 млн. теҥге суммылан эмым налаш контрактым ыштат, телемедицинылан 21,2 млн. теҥгеаш оборудованийым налашлан аукционым увертарыме шотышто конкурс документацийым ямдылен пытарат.
Чоҥымо паша, архитектур да илыме-коммунал озанлык министр Михаил Степанов «Йӧнан оласе кумдыкым ыштымаш», «Илаш йӧрдымӧ илыме фондым иземдымаш», «Яндар вӱд», «Юлым тазаҥдымаш» федеральный проект-влакым илышыш пуртымо нерген каласкален. Мутшо почеш, чоҥалтше объект-влак дене кылдалтше чыла паша график почеш шукталтеш, Волжскышто Тумер отым тӱзатыме да азам ыштыме пӧртым нӧлтымӧ кок проектым посна контрольыш налме.
Кугу тӱткыш «Граждан-влакым аварий лӱдыкшан илыме фонд гыч кусарымаш» республиканский адресный программылан ойыралтеш. Тудын кышкарыштыже 809 еҥым шуко пачеран 10 пӧртысӧ 286 пачерыш идалык мучаш марте кусараш палемдыме.
Чыла национальный проект дене пашам ончылтен шукташ, чыла показательым 100 процентлан шукташ манын, аныклыме средствам жапыштыже рашемдаш кӱлеш, палемден А.Евстифеев.
Регионым вуйлатыше промышленность, экономически вияҥмаш да торговльо министрлан чыла министерстве ден ведомствын нацпроект-влакым илышыш пуртымо жапым шуктымышым контрольыш налаш кӱштен.