23-25 октябрьыште Республикысе онкологий диспансер Йошкар-Олаште да регионысо районлаште илыше ӱдырамаш-влакым яра приниматлен. Кум кече жапыште 683 пациентым терген, ныл ӱдырамашлан шӧрту рак диагнозым шынден, индешым ешартыш шымлымашыш колтен, кандашылан сай качестван пуалмаш шотышто операцийыш направленийым пуэн.
Ӱдырамаш-влакын осал пуалмаш дене черланыме сӱретыштым ончалаш гын, шӧрту рак – икымше верыште. Тӱнямбалне ий еда 1250000 тыгай случай регистрироватлеш. Статистике почеш, шӧрту рак дене кажне кандашымше ӱдырамаш черланен кертеш. Тиде лӱдыкшӧ 40 ий деч вара кугемын толеш.
Таче Российыште 55000 ӱдырамаш шӧрту рак дене орлана. Марий Элыште онкологий черын чумыр структурыштыжо шӧрту рак – нылымше верыште.
М.ИВАНОВА.
